Atornerlugaanermit aniguinikoq: Nipangiusimanninnermik kultureqarneq ajoqutaavoq
Ileqquni nikittoqarsimavoq, ataatsimoorneq eqqarsaatigalugu meeqqat taamaalillutik pilliutigineqartarput, eqqumiitsuliortoq Gukki Nuka taama isumaqarpoq.
Ajortup aallaavia tigussagutsigut, kinguaassiutitigut atornerluinerpassuit kulturitsinnut attuumassuteqartut takusariaqarparput. Eqqumiitsuliortoq Gukki Nuka, nammineq 14-nik ukioqarluni Uummannami arsarnermik sungiusaasuminit atornerlugaasimasoq taama isumaqarpoq.
Aaja Chemnitz Larsenip (IA) oqariartuutigisaanut qisuariarnerit taassumunnga allaaserinnitsitsipput. Folketingimi politikerip kulturi aamma atornerluinerit attuumassuteqartut tikkuartorpai.
- Ataatsimoornerup ataasiakkaanut akerliunerat tamani aallaaviuvoq, Gukki Nuka Facebookimi taama allaaserisaqarpoq.
- Kinguaariippassuarni inuiaqatigiinni mikisuni ataatsimoorneq inuuniarnermi pingaarutilerujussuusimavoq, sorpassuartigullu nukittoqqutigisimavarput.
- Kisianni ataatsimoornerup ingerlanneqarnissaa pillugu ataasiakkaanik pilliuteqartuarutta, taamaalillutalu ataatsimoornermi napatitsisut illersortuarutsigit, ileqqorissaarnitsinnik aamma eqqortumik eqqunngitsumillu paasinnittariaatsitsinnik unioqqutitsigaluarpataluunniit, suup nalinginnaasuuneranik aamma nalinginnaannginneranik paasinnittarnerput isumakkeerfigineqarsinnaanngitsumik nikeriartoqarsimavoq.
Ajornartorsiutip aallaavia
Gukki Nukap arlaannaanilluunniit tapersiiniarsarinani oqaatigaa, kisianni oqallinneq paatsoorneqarsimasoq, taanna isumaqarpoq.
- Oqaaseq ataaseq, tassa kulturi atorlugu, oqallinneq killormut saatinneqartoq isumaqarpunga. Tamatumunnga taarsiullugu ajornartorsiutip aallaavia oqaluuserisariaqarparput, tassa nipangiusimanninnermut kulturi, atornerluisumik kisimi illersuisoq, taanna Sermitsiaq.AG-mut taama oqarpoq.
- Oqaatsinik ataasiakkaanik ingasattumik nassuiaanianeq qatsutiivippara, ajornartorsiutip aallaavia samminianngiinnarlugu.
Ataatsimoornermut tunngatillugu paatsuunganeq ileqqorissaarnermut malittarisassat nalinginnaasut atorunnaarsissimagaat, Gukki Nuka isumaqarpoq.
- Kalaallit Nunaanni sumiiffippassuarni kinguaassiutitigut atornerluilluni pinerliinerit pitittaratsigit aamma isiginngitsuusaartaratsigit nalinginnaasuinnanngupajaarpulluunniit, pitsaasumik ataatsimoornermut misigisimanermut kulturi taanna akorngusersueqataavoq, taanna ilanngussamini taama allappoq.
Eqquineq
Gukki Nuka Killiliisap maligassiuisuinut ilaavoq, atornerluinerillu pillugit ammanerulernermik pilersitsiniarluni Kalaallit Nunaanni sumiiffiit arlallit tikittareerpai. Tassanilu aamma ataatsimoornerup paatsoorneqartup pinerluuteqartumik illersuisarnera pillugu eqqarsaatersuutiminik oqaluttuartarpoq.
- Inunnit uannut tusarnaariartartunit ataatsimilluunniit tamanna pillugu akerlilerneqarnikuunngilanga, tamatumalu piviusuuneranik uannut uppernarsaataavoq, taanna Sermitsiaq.AG-mut oqarpoq.
- Kisianni soorunami maanna oqaatigisara qisuariarfigineqarsinnaasoq ilisimavara. Kisianni taamaattoqassappata eqquinera pissutaasimassaaq.
Pinerluutilik illersorunnaarlugu
Ataatsimoornerup isumaa eqqarsaatigeqqinneqartariaqartoq, Gukki Nuka isumaqarpoq.
- Ataatsimoornermik paasinnittaaserput qiviaqqittariaqarparput, mumisillugulu ataatsimoorneq pillugu ataasiakkaat illersortariaqarpagut, mattutiinnarnagu imaluunniit nipangiutiinnarnagu tunuinnarnaguluunniit, tunngaviusumik tamanna ajornartorsiummik pilersitsisuuvoq, taanna ilanngussamini taama allappoq.Gukki Nuka ataatsimooqqusivoq, kisianni aamma ajornartorsiutip isiginiarneqarnissaa oqariartuutigalugu.
- Ataatsimoorneq pillugu ajornartorsiutip aallaavia aaqqitsigu aamma pinerluuteqartoq illersorunnaarlugu. Pinerluffigineqartut uagutsinnit ikiorneqarnissamik illersorneqarnissamillu pisariaqartitsipput!