Atoqatigiinnginnermi akuerseqqaartarneq
Atoqatigiinnginnermi akuerseqqaartarnermut inatsimmut allannguut, Nunatsinni sapaatip akunneri arlaqanngitsut qaangiuppata atuutsinneqalissaaq. Inatsimmut atuutereersumut annertusaanerusoq, eqqartuussissuserisup Britta Keldsenip oqaatigaa.
Naqqiut juulip 13-iani allanngortinneqartoq. Ataani allaaserisami paatsoorsimasugut ilisimatinneqarpugut. Inatsimmi nutaami atoqatigiinnissamut akuersissummik uppernarsaateqarnissaq piumasaqaataalissanngilaq, naak akuerseqqaarnissaq piumasaqaatinngussagaluartoq, (red.).
Atoqatigiinniartut marluullutik atoqatigiinnissamut erseqqissumik akuersisimanngippata – tassa illuatungeriillutik akuersisimanngippata – pisoq pinngitsaaliisimanertut taaneqarsinnaassaaq.
Inatsisip nutaap, juulip aallaqqaataanni atuutilersussap kingunerisassai ilaatigut tamakkuupput.
Aviisi AG allappoq.
- Akuersissummik allakkatigut isumaqatigiissusiortoqartariaqassanngilaq, isumaqatigiittoqarsimanersorli qularutigineqartariaqanngilaq. Akuersaarneq oqaatiginngikkaluarlugu pisinnaavoq, eqqartuussissuserisoq Arctic Law-imeersoq oqarpoq.
Pinerluttulerinermut inatsit ullumikkut atuuttoq naapertorlugu pinngitsaaliilluni atoqatiginnissimasutut pineqaatissiisoqartarpoq, inoqammik allamik nakuusernikkut imaluunniit nakuusernissamik sioorasaarinikkut pinngitsaaliilluni atoqateqateqarneq imaluunniit allatut pinngitsaaliilluni atoqateqarneq. Inummik qanoq-issutsimigut imaluunniit pisumi iliuuserineqartumut akerliliisinnaanngitsumut atoqateqarneq, pinngitsaaliilluni atoqateqarnertut pineqaatissiissutaasarpoq.
- Allannguummut ilaatinneqarpoq, akuerseqqaartoqarsimatinnagu kinguaassiuutitigut atoqateqarneq pillarneqaataalissammat aamma akuerseqqaannginneq nipaatsumik akuersinertut imaluunniit paasinninnertut nassuiarneqarsinnaanani, Britta Keldsen oqarpoq.
Aviisimi AG-mi atuarnerusinnaavutit. Aviisi uani pissarsiariuk:
