Atlantikup Avannaaneersut sunniuteqarsinnaanerat pillugu oqallinneq: Eqqumiippoq aamma oqaaserisartakkamik akerliannik oqalupput, qinigaaqqittoq oqarpoq
Atlantikup Avannaaneersut naalakkersuisunngortitsinermi aalajangiisuusinnaanerisa oqallisigineqalernerat eqqumiillunilu oqaaserisartakkat akerliannik oqalunneruvoq, Folketingimut qinigaaqqittut marluk oqarput.
Danmarkimi partiit talerperliit siulittaasuisa folketingimut qinersisoqareersoq erseqqissaatiginikuuaat, atlantikup avannaaneersut taasinerit kisinneqarnerannut ilanngunneqanngittuuppata partiit talerperliit amerlanerussuteqassagaluartut.
Taamatut oqartoqarnerata malitsigisaanik atlantikup avannaanit qinigaasut qinersinermut aalajangiisuusinnaanerat inuit attaveqaqatigiittarfiisigut oqallisigineqangaatsialerpoq.
Folketingimut qinigaaqqittup Aaja Chemnitzip (IA) partiit siulittaasuisa pingasut oqaasii "eqqumiitsutut" taavai":
- Eqqumiippoq, pissutigalugu Kalaallit Nunaannit nunanut allanut sillimaniarnermullu tunngassutilinni sunniuteqarnerunissamik piumasaqaraangatta, oqarfigineqartarpugut tunngaviusumik inatsit allanngortinneqarsinnaanngitsoq pissutigalugu tamanna pisinnaanngitsoq. Maannalu partiinit talerperlernit tunngaviusumik inatsit allanngortikkusunneqalerpoq, partiit talerperliit amerlanerussuteqarnissamut ilaasortamik ataatsimik amigaateqarnerat pissutigalugu, politikkeri oqarpoq, nangillunilu:
Oqaaserisartakkamik akerliannik oqaaseqartut
- Tunngaviusumik inatsimmi allassimavoq, ilaasortaasugut tamatta naligiittugut, isumaqarpungalu kissaatigisatut amerlanerussuteqarusukkaluarluni, Kalaallit Nunaannit qinigaasuulluta inissisimaffitta nalilersoqqinneqannginnissaa pingaaruteqartoq.
Kalaallit Nunaanni qinigaaqqittup aappaa Aki-Matilda Høegh-Dam (S) aamma taamatut nipilimmik oqarpoq. Partiit talerperliit minkit pillugit suliaq innersuussutigalugu maanna ministeriunerugallartoq Mette Frederikseni (Soc.) pissaaneqarpallaarnerarlugu akerlilersungaatsiarlugu, tunngaviusumik inatsimmik malinninnissaata pingaaruteqassusia oqaatigisarlugu, maanna oqaaserisartakkamik akerliannik oqaaseqarput.
- Aamma taakku eqqaamassavaaat, tunngaviusumik inatsimmik atlantikullu avannaanit qinigaasunik ataqqinninnnissartik, taanna oqarpoq.
Aki-Matilda Høegh-Damip erseqqissaassutigaa, Mette Frederiksen ministeriunissartut toqqarsimallugut, isumaqarami tamanna Kalaallit Nunaannut pitsaanerpaasoq, partiillu talerperliit Kalaallit Nunaannit qinigaasut ikiortigerusukkunikkit isumaqatiginninniareersimassangaluarput:
Tallimanngornermi isumaqatiginninniarnerit aallartinneqassasut
- Socialdemokratit siuttuutillugit suleqatigilluarnerusarpavut, imaanngilarli partiinik talerperlernik suleqateqarsinnaanngitsugut, taanna oqarpoq.
Atlantikulli avannaanit qinigaasut Danmarkimi naalakkersuisussanik ministeriunerusussamillu toqqaaniarnermi qanoq aalajangiisuutigissanersut suli nalunarpoq.
Folketingimut qinigaaqqittut taakku marluullutik pilersaarutit malillugit sisamanngorpat Danmarkiliassapput, Mette Frederiksenip naalakkersuisunngortitsiniarnermi siuttussatut toqqarneqarsimasup tallimanngorpat isumaqatiginninniarnernik aallartitsineranut peqataajartorlutik.
Tassa Mette Frederiksen amerlanerussutilinnit akerlerineqanngitsumik naalakkersuisuutitassanik pilersitsinissamut periarfissanik misissuisussatut toqqarneqarsimavoq. Tamannalu tunngavigalugu partiit tamaasa ministeriunertut atorfeqartup inaani Marienborgimi isumaqatiginninniarnissamut qaaqqusimavai.