Atlantikup avannaamiut pinerluuteqarsimasunut isumaginnittoqarfik pillugu isumaqatiginninniaqataassasut

Folketingimi ilaasortat Savalimmiuneersut Kalaallillu Nunaanneersut pinerluuteqarsimasunut isumaginnittoqarfik pillugu ukiunut arlalinnut isumaqatiginninniartoqaraangat nalinginnaasumik ilaatinneqarneq ajoraluarput.

Tamanna ukiuni tulliuttuni sisamani atuuttussamik isumaqatigiissuteqarnikkut allanngortinneqarpoq. Edmund Joensen Savalimmiormioqatini Sjúrður Skaale Javnaðarflokkurin-imeersoq peqatigalugu inatsisinik atuutsitsinermut ministerimik Nick Hækkerupimik apriilip 22-ani ataatsimeeqatereerluni tamatumannga uppernarsaavoq.

- Qularinngilara peqataanitsigut pitsaanerusumik angusaqassalluta. Aamma qularinngilara suliaq pillugu pitsaanerusumik siunissaqartitseqataalissalluta, Edmund Joensen oqarpoq.

Aatsaavissuaq isumaqatiginninniaqataanerit

Kalaallit Nunaannit folketingimi ilaasortap Aaja Chemnitz Larsenip, IA, inatsisinik atuutsitsinermut ministerip neriorsuutaa pingaaruteqarluinnarnerarpaa.

Taassuma ilisimatitsissutigaa, folketingimi ilaasortat atlantikup avannaaneersut sisamat ataatsimoorlutik pinerluuteqarsimasunut isumaginnittoqarfik pillugu isumaqatiginninniarnermut peqataatinneqarnissaq pillugu Nick Hækkerupimut allagaqarsimasut.

- Peqataatinneqarnerput ajunngilluinarlunilu inissaminiippoq. Sisamaalluta ataatsimoorsimanerput peqaaruteqarpoq. Pinerluuteqarsimasunut isumaginnittoqarfik danskit oqartussaaffigaat, kisianni aaqqiissutissanik unammilligassanillu tikkuusseqataasinnaavugut. Peqataanngikkutta angusaqarniarneq ajornarsinnaavoq, Aaja Chemnitz Larsen oqarpoq.

Soqutigisanik illersuisoq

Savalimmiuni Edmund Joensen Sjúrður Skaalelu. suliami matumani suleqatigiipput. Savalimmiuni politikkerit ukiuni arlersuni Savalimmiuni parnaarussat pitsaanerusumik atugaqartinneqarnissaannik ujartuisarsimapput, ilaatigut Savalimmiuni sivisunerusumik parnaarussaaqqasoqartarnissaa anguniarlugu.

Savalimmiuni parnaarussivik ullumikkut Mjørkadalimiippoq, taanna radareqarfitoqqami sulisut najugaqarfigisarsimavaat. Taamaammat siunertamut atugassatut sanaajusimanani, taassuminngalu attartorneq 2023-mi atorunnaartussaavoq.

Lagmandip Bárður á Steig Nielsenip, Sambandsflokkurin, Savalimmiuni nutaamik parnaarussiviliortoqarnissaa inatsisinik atuutsitsinermut ministerimik aamma ministeriunermik Mette Frederiksenimik ukiaq oqaloqatigiissutigisimavaa.

Edmund Joensen oqarpoq, Savalimmiunut Kalaallillu Nunaannut tunngassutiglinnik isumaqatiginninniartoqarneranut ilaasortat atlantikup avannaaneersut peqataasassasut.

Ilaasortat Savalimmiuneersut tassunga atatillugu naalakkersuisut soqutigisaannik illersuisuupput, Edmund Joensen oqarpoq. Taassuma oqaatigerusunngilaa, Savalimmiuni nutaamik parnaarussiviliortoqarnissaa anguniagaanersoq.

- Pitsaanerusunik atortoqalernissaq Savalimmiunit kissaatigineqarpoq. Tamanna qanoq isumagineqassanersoq maannakkorpiaq oqaatigisinnaanngilarput. Isumaqatiginninniarnerit ingerlanneqarneranni tamanna paasinarsiumaarpoq, Edmund Joensen oqarpoq, nangillunilu oqaatigalugu, Savalimmiuni parnaarussivimmik pisariaqartitsineq misissoqqissaarneqartoq.