Atlantikup avannaa: Immap naqqanik aaqqiagiinngissuteqarneq qaangerneqartoq
Savalimmiut, Norge Islandilu nunap toqqavianut Savalimmiut avaannaata tungaaniittumut tunngatillugu isumaqatigiissimapput. Taamaalilluni Savalimmiut kunngeqarfillu 27.000 kvadratkilometerinik anginerulerpoq. Tamanna Danmarkip nunataata affaanut naapertuuppoq
Savalimmiut avannaata tungaani immap naqqanut tunngatillugu kikkut oqartussaanersut pillugu qangarsuarli aaqqiagiinngissutaasoq qaangiuppoq.
Nunanut allanut tunngasutigut naalakkersuisoq Jenis av Rana (M) aamma nunanut allanut ministeri Jeppe Kofod (S) kunngeqarfik sinnerlugu nunap killeqarfia pillugu isumaqatigiissummik, Savalimmiut avannaani nunap toqqavianik anginerulersitsisumik, ullumi atsioqatigiissapput.
Isumaqatigiissut Stockholmimi Nunani Avannarlerni Siunnersuisoqatigiit ukiumoortumik ataatsimiinnerannut atatillugu atsiorneqassaaq. Islandimi nunanut allanut ministeri Guðlaugur Þór Þórðarson Norgemilu nunanut allanut ministeriugallartoq Jens Frølich Holte Island Norgelu sinnerlugit atsiussapput.
Nunat taakku 2006-imi isumaqatigiissuteqarallarnikuupput. FN-ip suliaq suliarisimavaa isumaqatigiissullu akueralugu. Nunat pineqartut isumaqatiginninniarnerminnik ingerlatseqqissimapput, maannalu kiisami tamanna naammassisimallugu.
- Nuannaarutigaara, ukiorpassuarni isumaqatiginninniareerluta nunat eqqarleriit aaqqiagiinngissutigisinnaasaannik isumaqatigiissuteqaratta, Jenis av Rana oqarpoq.
Suleqatigiilluarsimaneq
Savalimmiuni naalakkersuisut siulittaasuata Danmarkimik suleqateqarsimaneq, nunanillu allanik isumaqatigiissuteqarnermi periusiusimasoq nersualaarpai.
- Angusarput nunat killeqarfii suliarisartakkallu akimorlugit, taakkununnga ilanngullugit nunanut uuttortaavinnut, nunap assiliortarneranut, diplomatinut eqqartuussissuserisunullu tunngatillugit suleqatigiilluarsimanermik aallaaveqarpoq. Angusaqarnittta takutippaa Danmarkip Savalimmiullu pitsaasumik nukittuumillu sulianut tunngatillugu suleqatigiilluarsimanerat, Jenis av Rana oqarpoq.
Danskit nunanut allanut ministeriat, Kalaallit Nunaannit Savalimmiunillu suleqatini peqatigalugit Stockholmimi ullumi oqallittoqarneranut peqataassaaq.
Taassuma nunap toqqavianut tunngatillugu piumasaqaatit qaleriiaakkaluartut isumaqatigiissuteqarneq nuannaarutigaa.
- Nunarsuup assingani titarnerit nutaat nunat tamat inatsisaat naapertorlugit iluarsineqassapput. Isumaqatigiissutit ullumi atsiugassavut FN-ip Imaanik piginnittussaanermut isumaqatigiissutaa naapertorlugu isumaqatigiissutaapput, aamma Atlantikup avannaanni Issittumilu killeqarfilerngusaassutaasinnaasut eqqissisimasumik qanoq aaqqiiffigineqarsinnaanerannut tamanna takussutissatsialaavoq, Jeppe Kofod oqarpoq.
Aaqqiagiinngissutit taamatut iluarsineqartarput
Jeppe Kofodip ilanngullugu oqaatigaa, Issittumut tunngatillugu aaqqiagiinngissutaasut qanoq iluarsiiffigineqarsinnaanerat isumaqatigiissutip nunanut allanut takutissinnaagaa.
- Naalagaaffiit pissaanilissuit Issittumut soqutiginnikkiartuinarfianni nunat avannarliiit naalagaaffeqatigiillu taamatut aqqutissiuinerat naammagisimaarpara, nunanut allanut ministeri oqarpoq.