Atlantikup Avannaa tamakkerlugu ajornartorsiorfiusoq
Coronamik ajornartorsiut Atlantikup Avannaani Kalaallit Nunaanni, Islandimi, Savalimmiuni Svalbardimilu niuerfinnik sakkortuumik eqquivoq. Tamanna Arctic Groupimit malugineqarluarpoq.
Coronamik ajornartorsiut Atlantikup Avannaanik tamarmiusumik sakkortuumik eqquisimavoq. Tamatumunnga atatillugu Kalaallit Nunaat, Island, Savalimmiut Svalbardilu assigiinngissuteqarpallaanngillat.
Aviisi Sermitsiaq taama allappoq.
Taama Arctic Group A/S-ip pisortaanera, Thomas Hjort, oqarpoq. Suliffeqarfiup Atlantikup Avannaani niuerfinni tamani najuunneratigut coronamik ajornartorsiutip Issittumi inuiaqatigiinnik inukitsunik mianernartunillu qanoq eqquisimanera amerlanerpaanit allanit tamakkiisumik takunnissinnaassuseqarfigineruaa.
Sumiiffinni tamani kinguariarneq
– Nalorninartorsiorneq sumiiffinni tamani assigiippoq, aamma Kalaallit Nunaanni, Islandimi Savalimmiuni Svalbardimilu kinguariarnermik misigisaqarpugut. Kisianni pisisartunut immikkoortortavut assigiinngitsorpassuit Covid-19-imik ajornartorsiummik qanoq eqqugaatigisimanerat assigiinngiiaarpoq.
– Kalaallit Nunaanni inuussutissanut tunngasunik kiffartuussinermik immikkoortortami aamma akunnittarfinnut neriniartarfinnullu pilersuisutut niuernermik annertuumik ingerlataqarpugut. Tamaani ajornartorsiorneq malugilluarparput. Isumaga naapertorlugu Kalaallit Nunaanni ukioq manna takornariaqarnerup annerpaartaata annaaneqarsimanera qularutissaanngilaq. Suliaqarfik aappaagumut tamakkiisumik ingerlalersinnaassanersoq aamma qularutigisinnaavara. Kalaallit Nunaannut angalanerit akisupput, taamaammallu amerlanertigut sioqqutsingaatsiarluni pilersaarusiorneqartarlutik.
– Isumalluarnartorli ataaseq tassaavoq Nuummi annissassanik neqerooruterpassuarnut pilersuineq. Nuummiut anillutik neriartortarneq nuannariuaannarsimavaat, kaaviiaartitallu ilarparujussui annissassanut assigiinngitsunik ilusilinnut tussimapput. Pisisartutsinnut kaaviiaartitat taakkua qujanartorujussuupput, kisiannili siornatigut niuernermik ingerlatanut taartaaqqajarsinnaanatik.
Aviisimi Sermitsiami atuarnerusinnaavutit, aviisi uani pissarsiariuk: