Atisaliat Issittumit isumassarsiorfiusut
Isaksenip atisaliai nutaat Malik Isaksenimit ilusilersorneqarput, kinguaariinnilu pingajuusoq ilaqutariit suliffeqarfianni maanna ilaalerpoq.
Nickie Isaksenip ukiaanerani atisaliai Isaksen Next Generationimik taaguuteqarput, tulluartumillu Nickie aamma Lars Isaksenip ernerannit Malik Isaksenimit ilusilersorneqarput, aviisi Sermitsiaq allappoq.
Nickiep suliffeqarfik 2002-mi anaananilu Rita Isaksen suliffeqarfik aallartippaat, maannalu kinguaariit pingajuat maanna ineriartortitsinermut ilannguppoq.
Nickie Isaksenip ilusilersuinermut pisortaasup suliffeqarfimmillu piginnittup amernik, meqqunik qilattakkanillu atuleqqippaa, atisalianilu saqqummertussani taakku atisaliornermi atortut takussaasorujussuussapput, taakku tamarmik Europami tunisassiarineqartut, taanna oqaluttuarpoq. Lars Isaksen ilaqutariit suliffeqarfiutaanni allaffissornermik suliaqartuuvoq, ernerallu maanna ilannguppoq.
- Isaksenip ilisarnaataa piujuartitsinissamik ukkatarinnittorujussuuvoq, pitsaassutsillu naammaginanngitsut aamma CSR-politikkimut (suliffeqarfiup inuiaqatigiinnut akisussaaqataanera) naapertuutinngitsut akuerineq ajorlugit, Nickie Isaksen Sermitsiamut nassuiaavoq.
Kinguaariinnit kingulleq
Malik Isaksen ilinniarnermi saniatigut Isaksenip pisiniarfiani Gl. kongevej 143-mi Københavnimi sulivoq.
- Ilaatigut pisiniarfiup igalaavini ilusilersuinermik suliaqartarpoq, atisaliornermullu aallussisorujussuuvoq, Nickie Isaksen Sermitsiamut oqarpoq, Malillu Isaksenip ilisarnaataanut isumassarsiorfiusorujussuanngorsimasoq aamma qalipaatinik ilusilersuinermullu toqqaanermi assiliinernilu oqaaseqarluni ikiuuttarpoq, attaveqatigiittarfinnilu saqqummiussinernut.
Malik Københavnimi eqqumiitsuliornermut ilinniarfimmut piareersaataasumik septembarimi ilinnialissaaq, ilusilersuinermi imaluunniit eqqumiitsuliornermi qaffasinnerusumik ilinniaqqinnissaq siunertaralugu.
- Isaksen design inuusunnerusunik ilaqalerpoq, siunissarlu isumalluarnarpoq, Nickie Isaksen Sermitsiamut taama oqarpoq.
Isaksen Design coronap nalaani ilaatigut unammilligassanittoq uani aviisimi Sermitsiaq-mi atuaruk: