Atermik allannguineq: Hudson Greenland Lumina-mik taaguuteqalertoq
Ulloq 1. januar 2022 aallarnerfigalugu Hudson Greenland Lumina-mik taaguuteqalerpoq, ingerlatseqatigiiffillu tamtumunnga peqatigitillugu niuerfinnut amerlanernut saalluni.
Lumina Nuummi allaffiup matuata Kangerlussuarmilu aatsitassarsiorfiup, anorthositimik piiaaffiullunilu suliarinneqqaarfiusup eqqaani ukiortaamiit allassimalissaaq. Taamaalilluni ilisimaneqarluartutut taaguut Hudson Greenland Lumina-mik taarserneqarluni.
Ateq Lumina isumaqarpoq qaamaneq, anorthositsillu qaqortumik qalipaateqarluni qaamaneranut takussutissaalluni, peqatigitillugulu tassunnga erseqqissaassutigineqarpoq, anorthositsimik tunisassiorneq suliniutinut allanut sanilliullugu avatangiisinut mingutsitsinnginnerusoq, ingerlatseqatigiiffimmi pisortaq Bent Olsvig Jensen tusagassiorfinnut nalunaaruteqarnermi nassuiaavoq.
- Anorthositip piginnaasai pissutigalugit arlilitsigut ’siunissami atortussiassaavoq’: Atortussiassaq sanaassanut allanut sanilliulluni avatangiisinut silamullu mingutsitsinnginnerusarpoq, taanna allanut taartaasinnaallunilu ilassutaasinnaavoq. Tassa piiaanermi atuinermilu suliarpassuarni atorneqartartuni: Anorthosit malunnaatilimmik CO2-mik aniatitsinnginnerusarpoq nukimmillu ullumikkut atorneqartartunit atuinikinnerusarluni, nalunaarummi oqaatigineqarpoq.
Sullitat amerlanerusut anguneqarsinnaanngussasut
Anorthositsimik tunisassiorneq aallartilluareeraluartoq sullitassanut anngunniarnermi suli annertuumik suliassaqartoqartoq, Bent Olsvig Jensenip nassuerutigaa. Taanna 2020-mi oktobarip qaammataanili Nuummi allaffimmi pisortaanerusimavoq.
– Tunisassiat aaqqiissutaasinnasullu nutaarluinnaat tunisassiarissavagut, aamma suliffissuaqarfiit minguinnerusumik ingerlatsilernissamut allannguiniarnerminni piffissamik atuisussaapput, minguinnerusumillu ingerlatsilernissaminnik suliaqarnerat qularutissaanngilaq, taanna oqarpoq.
- Nunani tamalaani tunisassiortut, soorlu qalipaatissanik sanaartornermilu atortussanik anorthositalinnik tunisassiortut, periarfissanik tunniussinnaasatsinnik soqutiginnilluarlutik takutitsinikuupput. Annertuunilli tunisassiulernissamut piffissaq ingerlasussaavoq, tassungalu atatillugu pisariaqartivitaannik tunniussisinnaasariaqarpugut. Taamaammat aatsitassarsiorfitta annertusaqqinneqarnissaanut naleqqussarneqarnissaanullu siorna aningaasaliissuteqarsimavugut, taanna oqarpoq.
Taassuma niuerfiit arlallit Kalaallit Nunaanni tunisassiamik Lumina-mik iluaquteqarsinnaanerat periarfissaqarluarnerarpaa:
- Anorthosit silamut nukissiornermullu mingutsitsinnginnerunerata saniatigut, atortussiassat allat pitsaassusaannut atasinnaanerannullu ilapittuutaasinnaavoq. Taamaammat niuerfitta annertusineqarnissaat periarfissaqarluarsorivarput. Nutaamik ateqalernitsigut minguinnerusunik tunisassiortuunitsinni ineriartornermut - tassa aatsitassarsiornermiit minguinnerusunik aaqqiissutaasinnaasunik tunisassiorsinnaanerput takutikkusussimavarput, Bent Olsvig Jensen naggasiivoq.
Allamik ateqalernikkut ingerlatseqatigiiffiup aqunneqarnera piginnittuilu, tassaasut Hudson Resources, Cordiant Capital og Apex Asset Management allannguuteqanngillat. Greenland Venture Hudson Resourcesimi piginneqatigiissuteqarnermigut piginneqataasuuvoq.