Atassut: Tunngaviusumik inatsisissaq pillugu isumalioqatigiissitamut aningaasanik asuli atuijunnaartoqarli
Atassummi siulittaasup tullia Nikolaj Rosing isumaqarpoq, tunngaviusumik inatsisissaq pillugu isumalioqatigiissitaq nalilersoqqinneqartariaqalersoq
Atassut isumaqarpoq, tunngaviusumik inatsisissaq pillugu isumalioqatigiissitaq aningaasanik atuiluffiuinnartutut isikkoqaleriartuinnartoq.
- Tamatta siunissami qaninnermi namminiilivikkusunngitsuusugut ilanngulluta akileraartarnikkut tunngaviusumik inatsisissaq pillugu isumalioqatigiisitarsuaq akilersugaraarput. Taamaammat paaserusunnarsivoq inuiaqatigiit akiliutaat qaffakkiartuinnartut atorlugit una suliaq ilumut attatiinnarniarneqarnersoq, partiimi siulittaasup tullia Nikolaj Rosing tusagassiorfinnut nalunaaruteqarnermini oqarpoq.
- Piviusorsiunngippallaarsimanerami kusassaataaginnarsimaneramiluunniit suliaq unittooqqasimasinnaammat isumalioqatigiisitarsuaq nalilersoqqittariaqalerparput ilumut miliuunerpassuit tassunga atorusunnerlutigit.
Siorna novembaerip qaammataani Suleqatigiissitsisut isumalioqatigiissitamit ilaasortaajunnaarput, innersuussutigalugu suliaq nikinneq ajortoq. Tamanna pivoq Doris J. Jensenip (S) isumalioqatigiissitami siulittaasutut tunuarmat. Atassulli suli taamatut iliorusunngilaq.
- Atassummiit isumalioqatigiisitarsuaq peqataaffigiinnarniarlugu nalunaarnikuuvugut, illuatungiliuuttutut niperput tusaaneqarniassammat, sinnattuaqinerlu aallaavigalugu suliaq ingerlannginniassammat.
Tunngaviusumik inatsisissaq pillugu isumalioqatigiissitaq 2016-imi novemberip qaammataani pilersinneqarpoq. Taamanikkut Inatsisartut sapaatip akunnerata naanerani suliaq sukkasuupilussuarmik suliareriarlugu akuersissutigaat. Taamanikkut siunertarineqaraluarpoq, suliaq siorna kingusinnerpaamilluunniit ukioq manna naammassineqarsimassasoq.
Suliniarnerli aallaqqaataaniilli ajornartorsiorfiusarsimavoq. Isumalioqatigiissitami siulitaasoq Vivian Motzfeldt taamanikkullu naalakkersuisuusoq Suka K. Frederiksen suliassaq pillugu isumaqatigiinngissuteqarlutik aallartipput. Tamatuma kingorna suliniarneq arlaleriarluni unittarsimavoq, sulilu maanna Doris J. Jensenip paarlatsissaanik nassaartoqarani. Tunngaviusumilluunniit inatsisissap qanoq isikkoqarnissaa maannamut suli tamanut saqqummiunneqanngilaq.
- Aningaasaajaataannartulli atussappat Atassummiit peqataaffigissanngilarput, Nikolaj Rosing oqarpoq.