Atassut: Namminiilivinnissamik oqalunneq nukittuunngortitsinngilaq
Qineqqusaarnerit nalaanni partiit oqallisingingaatsiartagaasa ilagaat namminiilivinnissaq. Atassut isumaqarpoq namminiilivinnissaq pillugu oqallinneq inuiaqatigiinnut sanngiillisitsisoq. Partiit qanoq isumaqarnersut uani atuaruk:
Kalaallit Nunaanni partiit ilaasa maannakkorpiaq namminiilivinnissaq illuatungilerluinnarpaat.
Atassut isumaqarpoq namminiilivinniarneq inuiaqatigiinnut sanngiillisitsisoq. Tusagassiorfinnut nalunaarummini partiimi siulittaasup Aqqalu Jerimiassenip erseqqissarpaa inuk siulliullugu sullinneqartariaqartoq, nunallu namminiilivinnissaanut sulineq kingulliunneqartariaqartoq.
- Oqariartuut pingaarneq tassaavoq, namminiilivinnikkut inuk nukittorsarnavianngilarput. Inunguna peqqissoq, atugarissaartoq, imminullu napatissinnaasup nammineernissamik piginnaasalik, erseqqissaavoq.
Suleqatigiissitsisunit Cecilie Marie Jakobsen qineqqusaarnermi oqallinnermi erseqqissaavoq nunami ajornartorsiutit aaqqiiviginiarlugit partii sulisoq, namminersulivinnerlu ajornartorsiutinik aaqqiinavianngitsoq.
Akuersaartut
Partiit namminiilivinnissamut akuersaartuunermik erseqqissumik nalunaartut tassaapput Siumut, Nunatta Qitornai aamma Naleraq.
Siumut Inatsisartunut qineqqusaarumminik saqqummiussigami erseqqissaatigaa Kalaallit Nunaata namminiilivinnissaanik pingaarnertut suliniuteqarluni.
Siumut siulittaasuata erseqqissaatigaa oqartussaaffiit Danmarkimiit angerlaassornissaannut suliniutit sukkanerulertariaqartut. Erseqqissumilli oqaatigisinnaanagu qaqugu angerlaassuinerit aallartissanersut.
Namminiilivinnissamut pilersaarut
Nunatta Qitornai nunatta namminiilivinnissaanut aqqanilinnik alloriarfilerlugu pilersaarusiorsimavoq.
Danmarkimiit oqartussaaffinnik angerlaassuilernissamut piffissalikkamik pilersaarusiaq aappaagu naammassillugu saqqummiunneqassaaq, taamatullu Kalaallit Nunaanni innuttaasut 2025-iutinnagu tunngaviusumik inatsimmut isummerlutik tikkuussisumik taasitinneqassallutik.
Naleraq free associationitut inissinnissamik suliniuteqarusuppoq. Kalaallit Nunaat namminiivilluni aalajangersinnaassusilerneqassaaq, Danmarkili suli tapiisassalluni, isumaqarput.
Konto aningaasaqartariaqarpoq
Inuit Ataqatigiit namminiilivinnissamut aamma akuersaartuuvoq. Partiilli Inatsisartunut qineqqusaarutiminik saqqummiigami namminiilivinnissaq oqaaseqarfigineqanngilaq.
- Ersarissumik oqaatigissavara, Inuit Ataqatigiit namminiilivinnissamut akuersaartuupput. Tassungali pitinnata aningaasaqarneq ineriartornerlu ukkanneqarnerusariaqarput. Inuiaqatigiit assakaasorsui akornuteqaratik ingerlallualerpata, namminiilivinnissamut oqallinnissaq inissaqarnerulerumaarpoq, Múte Bourup Egede saqqummeereernerup kingorna nassuiaavoq.
Demokraatit erseqqissaapput politikkikkut namminiilivinnissaq anguniagaralugu. Nuna innuttaasullu aningaasaqarnikkut imminut napatittut sulissutiginiarpai. Namminiilivinnermili inuiaqatigiit atugarissaarnerat innarlerneqassanngitsoq, erseqqissaassutigalugu.
Pilersaarutissatut taaneqarnerit ilagaat inuussutissalerinermut oqartussaaffiup angerlaanneqarnissaa. Oqartussaaffik taanna nunatsinnut angerlaanneqarnerani aningaasartuuteqaraluarluni siunissami isertitaqassutaalertussatut isigineqarpoq.