Atassut: Naleraq ileqqorluppallaaqaaq
Atassutip siulittaasuata Aqqalu C. Jerimiassenip, Naleraq isumaqatigiissutaasumik unioqqutitsilluni Avannaata Kommuniani Siumumeersumik Minik Høegh-Damimik isumaqatigiissuteqariataarsimasoq sakkortuumik isornartorsiorpaa.
Demokraatit, IA Atassullu isumaqarsimagaluarput Naleqqamut isumaqatigiissuteqarfigisimallugu, Siumumi borgmesteriusup Palle Jerimiassenip taaguunneqarnerpaasimasullu Minik Høegh-Damip aaqqiagiinngissuteqarnerat iluarsineqartinnagu, Avannaata Kommuniani ukiuni sisamani tulliuttuni atuuttussamik partiit isumaqatiginninniassanngitsut.
Arfininngormat Naleraq Minik Høegh-Damilu isumaqatigiissumminnik atsiorput, taamalu borgmesteriujunnaartup Palle Jerimiassenip partiimi anilluni attaviittunngornerminik nalunaaruteqarneratigut partiit taakku marluk amerlanerussuteqalerlutik.
Partiit pingasut taamaalillutik kommunimi politikkikkut pingaarnertut anguniagaasunut sunniuteqarsinnaajunnaarput.
Imminissarsiorluni iliuuseqarneq
- Siumumi ajornartorsiuteqartoqarnerata aaqqiiffigineqaqqaarnissaa utaqqiniarlugu imitsinnut assammereersugut, Naleqqap isumaqatigiissusioriasaarsimanera ileqqorlunneruallaaqaaq, Atassup siulittaasua Aqqalu C. Jerimiassen kommunalbestyrelsimut qinigaaqqittoq erseqqissaavoq.
- Imminissarsiorluni iliuuseqarneruvoq, pakatseqaangalu, Aqqalu C. Jerimiassen ukiut sisamat tulliuttut ingerlaneranni kommunalbestyrelsimi suleqatigiinnerup qanoq innissaanik siumut oqaaseqaruminaatsitsisoq oqarpoq.
Ullumikkut agguataarsimanerat
Palle Jerimiassenip Siumumit anilluni attaviittunngornissamik aalajangernerata kingorna kommunalbestyrelsimi ilaasortat 17-iusut imatut agguataarsimalerput:
- Siumut: 8
- Naleraq: 2
- Atassut: 2
- Demokraterne: 1
- IA: 3
- Attaviitsoq: 1