Atassut: Naalagaaffeqatigiinneq pingaaruteqarpoq
Aqqalu C. Jerimiassenip Atassutip siulittaasuatut ukiortaami oqalugiaqqaarami kaammattuutigaa, Naalagaaffeqatigiinnerup iluani suleqatigiinneq nukittorsaqqinneqassasoq.
Atassut 2019-imi ataatsimeersuarpoq nutaamillu siulittaasortaarluni, Siverth K. Heilmann ukiuni marluinnarni siulittaasooreerluni tunuarmat.
Siulittaasunngorlaap Aqqalu C. Jerimiassenip ukiortaami oqalugiarami oqaatigaa, ukioq 2019 Atassutip ileqquusumik ataatsimeersuarnerata ingerlanneqarnerani nutaamik alloriaqqinnerit, Atassutillu partiitut sorlaqarfimminut uteriaqqinnerani, nunatsinni innuttaasut nunaqavissut, kalaallisut qallunaatullu oqaasiliusut ataatsimoortumik isigisariaqaqqilerneri naalagaaffeqatigiinnerullu pingaartuunera pingaartilluinnarlugit oqariartuutigerusupparput.
– Ukioq 2019 ataatsimut taassagaanni pisoqarfiusimaqaaq, nunap ingerlarnga tamakkerluni sunnerneqaqqasimaqaaq. Puiguinnangassaanngeqaarlumi nunatta oqaluttuarisaanerani aatsaat taamak naalagaaffeqatigiinnerup ingerlanerani pingaaruteqartigisumik suleqatigiittariaqarnerup ersersinneqarnera, Aqqalu C. Jerimiassen oqarpoq.
Partii isumaqarpoq, naalagaaffeqatigiinnerup iluani suleqatigiinneq suli nukittunerusoq ingerlanneqartariaqarpoq, inuusuttortagut nunatta avataanut ilinniariartorniartut suli pitsaanerusumik sammisariaqarpagut, Qallunaat nunaat Savalimmiullu qanimut suleqatigilluarnerulernerisigut ilinniartitaanikkut avitseqatigiinnerit pitsaasut sinaakkusertariaqarmata naqissusikkamik.
– Sanngiiffigut nunallu naalagaaffeqatitta sanngiiffii tamatsinnut nunatut pingasuulluta kunngeqarfimmi nukittuumik inississagutta isiginiartariaqaratsigit, tassuunakku nukittuffinnik nunaanik pilersitsisinnaangatta, ataasiakkaatummi nukittuffeqaqaagut, ataatsimulli suli nukittunerusinnaaqaluta suleqatigiilluarnikkut. Nuna ilinniangaqarnikkut nukittuumik inissisimasoq aningaasaqarnikkuttaaq pitsaasumik ineriartornissaminut periarfissagissaaqaaq, tamaattumillu ilinniarluarsimasortatta suli pitsaanerusumik periarfissaqarnissaat pisariaqarpoq, nunatsinnut utertittarnissaannut kaammattuiuarnerup atungassarititaasutigullu periarfissiilluarnerup piviusunngortissinnaavaa , Aqqalu C. Jerimiassen oqarpoq.
Aaamma oqaatigaa Atassummiit isiginianngitsoorusunneqanngirsoq, ajoraluaqisumik ukioq 2019 kingumut inuiaqatigiit pilliutigalugit aningaasaqarneq inissinneqarmat.
– Illuanik naalagaaffeqatitsinnut aningaasanik ikiorserneqarnissamik noqqaassuteqarniarnitsinni meerartatta isumaginninnikkut ikiorserneqartariaqarnerpaaffianni, nunatta nammineq nunatut aningaasaatai namminiilivinnissamut tunngassutilinnut annertoqisut atorniarsaraagut. Namminiilivinnissamut ulapinneq unikaallatsinneqartariaqarpoq, meeqqat ukiuattut taajuusiineq tassuunakkut piviusunngortinneqarsimasinnaavoq, aningaasarpassuit meerartatta atugaannut sammisumik atugassaagaluit namminiilivikkusunnerujussuarmut sammisumut pingaarnersiuinermik taallugu atorneqarmata .
Pinngortitaq, hash takornariaqarnerlu
Aqqalu C. Jeremiassenip aamma innuttaasunut kaammattuutigaa, pinngortitaq ikioqatigiillutik paarissagaat. Meerartagut kaammattortuartariaqarpagut issittumi pinngortitatta qanoq paarilluartariaqarneranik, ukioq 2020 tassaatittariaqaraluarluguttaarmi allaat ”eqqiluitsuunerup ukiua”.
Atassummit aamma kissaatigineqarpoq, hashimik atornerluineq kipitinneqassappat allatut eqqarsartoqartariaqalersoq, ilaatigut ikiaroornartup hasip ulorianaqisup qanoq akiorneqarnissaa oqallisigalugu.
– Ikiaroornartumut hashimut ersinngitsukkut aningaasarpassuit nunatsinnit tammaraannartuarnerat suli annertuumik ingerlajuarpoq, qanorluunniillu annertutigisumik akiuiniarnermut aningaasaliiuartaraluartilluta sukateriaraluarlutalu akulloqquffissanik peqartuartoq takuneqarsinnaavoq.
Atassummit aamma takornariat ataasiakkaat aningaasarsiorfigerusunneqarput innuttaasullu sanianiit isiginnaaginnarsinnaanerat pinngitsoortikkusunneqarluni.
– Nuna sanilerput Island perunaversaartariaqarparput, takornariaqalipiloorujussarnikkut aqussinnaajunnaakkaminnik inissisimalernerminni pinngortitartik ulluinnarnilu inooriaasertik arlalitsigut annertuumik pilliuteqarfigaat. Tamanna pinngitsoortitsinniarutsigu maanngangaaq mittarfiit nutaat naammassitinannagit inatsisitigut immitsinnut illersorsinnaalluarluta inissereertariaqarpugut .