Atassut: Kalaallit Nunaata peqqinnissaqarfik artorpaa
Atassummit Bentiaraq Ottosen isumaqarpoq Kalaallit Nunaata peqqinnissaqarfik naammaginartumik ingerlassinnaanngikkaa. Pissutsit saqqummiunneqarnerannut peqqissutsimut naalakkersuisunngorlaaq isumaqataanngilluinnarpoq.
Kalaallit Nunaat meeqqat kigutaasa narlorsarnissaannut akissaqannginnera, peqqinnissaqarfimmut tunngatillugu akisussaaffimmik tigummissinnaannginneranik takutitsiinnarpoq. Atassummit Bentiaraq Ottosen taama isumaqarpoq. Taanna isumaqarpoq meeqqat kigutaasa narlorsarnissaannut akissaqannginneq takutitsisoq Kalaallit Nunaata peqqinnissaqarfiup naalagaaffimmut tunniuttariaqaraa.
- Allaallu Peqqissutsimut Naalakkersuisoqarfik Naalagaaffimmut uterteqqinneqarnissaa periarfissatut eqqartortariaqalerparput. Ullumikkut Nunatta sineriaa qiviariarutsigu nakorsassaaleqinerit, peqqissaasussaaleqinerit illoqarfinni nunaqarfinnilu isorliunerusuni maluginiarneqarsinnaapput, Atassut tunuliaqutarlugu politikeri Bentiaraq Ottosen tusagassiorfinnut nalunaaruteqarluni allappoq.
Akiligassaq akitsuutinik akilerneqartarpoq
Peqqinnissaqarfiup danskit naalagaaffiannut tunniunneqarnissaa pillugu Bentiaraq Ottosenip oqaaseqarnera siulliunngilaq. Taanna isumaqarpoq Kalaallit Nunaata peqqinnissaqarfimmik tigumminninnera aningaasaqarnikkut sulisoqarnikkullu illersorsinnaanngitsoq.
Bentiaraq Ottosen isumaqarpoq akitsuutit qaffasissut kisiisa atorlugit inuiaqatigiit ingerlanneqarsinnaanngitsut.
- Naalagaaffeqatigiineq pingaaruteqarluinnartuunera aatsaat taamak pingaaruteqartigaaq, ullumikkut nunatsinni nunatut akiliisinnaasuserput akitsuutinik sequtserneqarpoq, allappoq nangillunilu:
- Nuna namminersulivinniarluni aningaasaqarnikkut peqqissutsikkullu ajutooqqasumiit, inuk peqqissoq nammineersinnaassusilik pingaarneruli.
Naalakkersuisoq isumaqataanngilaq
Peqqissutsimut naalakkersuisunngorlaaq Anna Wangenheim (D), peqqinnissaqarfiup iluani misilittagaqarluartoq, peqqinnissaqarfiup iluani unammilligassat pillugit Atassummit saqqummiussat isumaqatiginngilai.
Taanna isumaqarpoq peqqinnissaqarfiup iluani pitsaasorpassuarnik suliaqartoqartoq, nersualaarneqanngitsoortartulli:
- Peqqissaasut nakorsallu nunatsinni assigiinngitsorpassuarnik suliaqarput, assaallu sulisut taakkuinnaasut atorlugit suliarineqartartut amerlineqarnikuupput. Akisussaaffik Danmarkimut tunniunneqassappat, inuiaqatigiinnit ungasippallaartumit politikkikkut aalajangertarneq pisalissaaq. Isumaqataanngilluinnarpoq, Anna Wangenheim oqarpoq.