Atassutip siunnerfivimminut uternera pissutigalugu ingerlatsinermi siulittaasup tullia Partii Naleqqamut nuuppoq

Aqqaluk Heilmann partiimi qaammatini marlunni ingerlatsinermi siulittaasup tulliatut inissisimareerluni partiimi ilaasortaajunnaarpoq. Nunap namminersulivinnissaannut suleqataarusuppoq, Partii Naleqqamullu nuulluni.

Atassutip anguniakkaminik allannguinerata kingorna partiimi ingerlatsinermi siulittaasup tullia, Aqqaluk Heilmann partiimit tunuarpoq. Aqqaluk Heilmannip nunatta namminiilivinnissaa sulissutigerusunneruaa, partiilu naalagaaffeqatigiinnermut akuersaartunngoqqinnera tunngavigalugu maanna tunuarluni.

- Naalagaaffeqatigiissinnaanngilagut Kalaallit Nunaalluunnii naalagaaffiunngitsoq. Nunatta namminiilivinnissaa sulissutigerusunnerua, taamaattumik Atassummiiginnarsinnaajunnaarpunga, Aqqaluk Heilmann oqaluttuarpoq.

Aqqaluk Heilmann sermitsiaq.ag-mut ilisimatitsivoq Partii Naleqqami ilaasortanngorluni.

- Inatsisartuni ilaasortatut sulininni maluginiarsimavara siunnersuutikka suugaluarpataluunniit Partii Naleqqamit taperserneqartuartut, partiilu isorliunerusut atugaannik pitsanngorsaaniarluni suliniuteqartuusoq. Qaninnerulersimagakkit partiimi tassani ilaasortanngorpunga, oqarpoq.

Taassuma erseqqissaatigaa Partii Naleraq tunuliaqutaralugu pissakinnerusut, meeqqat inuusuttullu suli sullissallugit, isumaqarlunilu Partii Naleqqap anguniagaanut nammineq anguniakkani naapertuuttut.

Ingerlatsinermi siulittaasup tullia

Atassut novemberip qulingiluaani 2019-imi nalinginnaasumik ataatsimeersuarmat Aqqaluk Heilmann siulittaasup tulliattut sassarpoq, ingerlatsinermilu siulittaasup tulliatut qinerneqarluni.

Nalinginnaasumik ataatsimeersuarnerulli aqaguani paasinarsivpq partiimi ilaasortat amerlanerussuteqartut naalagaaffeqatigiinnerup nukittunerulernissaanut suliniuteqarusuttut.

- Atassutip anguniakkatut siunniussai ataqqivakka. Kalaallit Nunaatali namminiilivinnissaanut nukikka atorusunneruakka, Danmarkimullu isaasalerlugu “panissiaaneq” qimakkusunnerullugu, Aqqaluk Heilmann oqarpoq.

Taassuma erseqqissaatigaa nammineq liberaliugami Atassummi ilaasortaasimalluni.

Aqqaluk Heilmann ilisimatitsivoq, isumaqatigiissutaasimasut malillugit Inatsisartuni sinniisussatut siullertut inissisimanerminit aamma tunuarluni. Avannaata Kommunianili kommunalbestyrelsemi sulinini ingerlatiinnassavaa.

- Misigisimavunga kommunimi qinersisartut anguniakkakka aallaavigalugit qinersimagaannga. Taamaattumi Partii Naleraq tunuliaqutaralugu kommunalbestyrelsemi sulinera ingerlatiinnassavara.

Powered by Labrador CMS