isorliunerusut

Atassutip nuutsitsinissamut siunnersuut isornartorsiorpaa

Qeqqanit, Kujallermit aamma Qaasuitsumit nuutsitsinissamut siunnersuut suliarilluagaanngilaq, pisortaniillu sullissineq akisunerulersissavaa, Atassutip gruppiani siulittaasoq isumaqarpoq

Atassummi siulittaasup tullia aamma gruppimi siulittaasoq, Steen Lynge

- Nuup avataani ineriartortoqarnissaanik aamma Atassummiit isumaqataaffigineqarpoq. Taamaattorli Atassummiit isumaqataaffigineqanngilaq suliffissat tungaasigut aaqqiinerussasoq suliffiit pioreersut Nuup avataanut nuunneqarnerisigut.

Atassummi siulittaasup tullia aamma gruppimi siulittaasoq, Steen Lynge, ullumi tusagassiuutinut nalunaarummi taama allappoq, taanna pisortani atorfiit 600-t Nuummit sinerissamut nuunneqarnissaannut siunnersuummut qisuariaataavoq.

Atuaruk: Siunnersuut: Nuummi suliffiit 600-t ukununnga nuussapput

- Taamaattoqassappat suliffissanik nutaanik nunatsinni pilersitsinerussanngilaq. Suliffssatigut ajornartorsiut nuuginnarneqassammat, malitsigisaanillu nutaanik aningaasartuuteqarfiulissalluni, taamaasillunilu nunatta aningaasaqarneranut iluaqusiinaviarani, Lynge oqarpoq.

Kristiansen nipangersimasoq
Taamatut oqariartuuteqarnermik partii Atassut nassiussisuuvoq, aamma e-maili tusagassiuutinut nalunaarut partiip siunnersortaanit nassiussaavoq.

Taamaakkaluartoq partiimi siulittaasup, attaveqaqatigiinnermut naalakkersuisup, Knud Kristiansenip (S), nuutsitsinissamik siunnersuut tunuarsimaarfigaa.

Akerleriiffiusoq
Sermitsiaq.AG-p Knud Kristiansen apersorumavaa, tamannali allattaata itigartitsissutigaa, nuutsitsinissamut siunnersuut 'partiimi politikkimut' tunngasuuneranik innersuussilluni.

Apersuinissamillu apeqquteqaat Atassummut ingerlateqqipparput.

Atuaruk: Kirkegaard nuutsitsinissamut siunnersuummut qulartoq

Partiip tusagassiuutinut nalunaarutaata naqissuserpaa, Qeqqanit, Qaasuitsumit aamma Kujallermit nuussuinissamut siunnersuut inuiaqatigiinnut akisoorujussuussasoq, sulisuusunik nuussiniarneq taamaattumillu inuiaqatigiinnut aningaasartuutaassammat, kiisalu aamma sanaartugassat nutaat, inissiallu nutaat aningaasartuutaasussammata.

Steen Lyngellu kommunerujussuanngortitsineq aamma peqqinnissaqarfiup nunatta immikkoortuinut katiteriffigineqarneri pitsaasumik aajalangiisimanertut oqaatigai.

Akisuallaalissasoq
- Taamaattut tunngavilersuutit suliffinnut Nuup avataanut nussuiniarnermi atussallugit kukkuneruvoq, paarlattuanimmi kingunerissammagu annertuumik ingerlatseriaatsip annaaneqarneranut taamatullu aamma nalunngisaqassutsip qatangiinnartilerneqarneranut, partiip siulittaasuata tullia aamma gruppimi siulittaasua allappoq, kommuninillu pingasunit siunnersuut politikkikkut kissaateqarfittut taavaa, annerusumillu aningaasartuutissaanerarlugu.

Atuaruk: Siumup nuutsitsinissamik siunnersuut taperserpaa

Suliffiit sinerissamut nuutsinneqartariaqarpat - Qanoq isumaqarpit?

Powered by Labrador CMS