Atassutip isummaminik allanngortitseriasaarnerata isumaqatiginninniarnerit unitsikkai

Inatsisissatut siunnersuummut ataatsimiititaliami isumaqataasimaneq peqqissimissutigineqarsinnaava? Apeqqut taanna pingasunngornermi ualikkut Inatsisartuni isumaqatiginninniartoqarneranik unitsitsisimavoq.

Inatsisartuni isumaqatiginninniarnerit allamut sangutinneqariasaarsimapput, tassa naalakkersuisooqatigiinnut tapersersortaasut Atassutikkut oqaluttarfimmi oqaaseqarnerminni politikkikkut isummaminnik allanngortitseriasaarmata.

Ilaatigut akeqanngitsumik iluaqutigineqartartut akileraarusersorneqartarneranni malittarisassat pillugit siunnersuutip suliarineqarnerani, Atassut Inatsisartut ataatsimiittarfianni naalakkersuisooqatigiinut akerlileeriasaarpoq. Siulittaasup Aqqalu Jerimiassenip oqaatigaa, Atassut siunnersuummut tapersersuisinnaanngitsoq, partiip tamanna akileraarutinik qaffaanissatut isigimmagu.

Taamatut oqaaseqarnera tupaallatsitsivoq, Aqqalu Jerimiassenimi Inatsisartut Aningaasaqarnermut Akileraartarnermullu Ataatsimiititaliaanni taasisoqarmat aalajangiisuusimavoq, taamalu inatsisissatut siunnersuutip ataatsimiitaliami suliarineqarnerani akuerineqarnissaanullu inassuteqaammi amerlanerussusiisimalluni:

- Partiip politikkianut akerliusumik siunnersuuteqartoqartarnera qissaarnartarpoq. Tamanna akueriuminaalluinnartut ilagisinnaasarpaat. Ataatsimiititaliami siunnersuummut akuerseqataangama peqqissaarussisimanngilanga. Akuersaarneqarsinnaanngitsut qanorluunniit annertutigingaluarpata tamaasa akueriinnartarsinnaanngilagut, Aqqalu Jerimiassen oqaluttarfimmiit oqarpoq.

Jensen unikkallartoqarnissaanik piumasaqartoq

Siumut inatsisissatut siunnersuummut akerliulluinnartuuvoq, Atassummiillu isummamik allanngueriasaartoqarmat, Siumumi siulittaasup Erik Jensenip ataatsimiinnerup unitsikkallarneqarnissaa piumasaraa, tassa ataatsimiititaliami siunnersuummut akuersaariarluni oqaluttarfimmiit akerlerluinnaanik oqaaseqarsinnaanermut malittarisassaqarnersoq paasiniarlugu.

- Ataatsimiititaliami isumaqataallunga oqaaseqarsimanera kukkuneruvoq, Aqqalu Jerimiassen ataatsimiinnerup unitsikkallarneqarnissaanik Inatsisartut siulittaasuat Hans Enoksen suli akuersinngitsoq oqarpoq.

Unikkallartoqareersoq Hans Enoksenip oqaatigaa, suliaq siulittaasoqarfimmi oqaluuserineqarsimasoq, inatsisissatullu siunnersuutip suliarineqarnera unitsikkasuarneqartoq, suliarlu Aningaasaqarnermut Akileraartarnermullu Ataatsimiititaliamut suliareqqitassanngorlugu nassiunneqassasoq oqaatigalugu.

Hans Enoksenip naatsorsuutigaa, inatsisissatut siunnersuut sisamanngornermi Inatsisartuni suliaralugu ingerlateqqinneqassasoq.

Powered by Labrador CMS