Imigassaq

Atassutip inuusuttaat imigassamik killilersuinermut kamattut

Naalakkersuisut innuttaasunut angajoqqaajusoripput, Atassutip inuusuttaanni siulittaasoq Aqqalu Jerimiassen oqarpoq, imigassamut killilersuinerulertoqarnissaa taassuma paasisinnaanngilluinnarpaa

Naalakkersuisut innuttaasunut angajoqqaajusoripput, Atassutip inuusuttaanni siulittaasoq Aqqalu Jerimiassen oqarpoq, imigassamut killilersuinerulertoqarnissaa taassuma paasisinnaanngilluinnarpaa

- Naalakkersuisut imigassamik killilersuiniarsarinerujussuumuna suna siunertarigaat? Sovjetunionitoqaq tikilluaqqunialerparput?

Atassutip inuusuttaasa siulittaasuat Aqqalu Jerimiassen taama aperivoq, taassuma AG-mi atuarneqarsinnaasutut Naalakkersuisut imigassat akikillineqartarnerannik inerteqquteqalersitsiniartut imerniartarfinnilu ammasarfiinik killilersuiniartut paasisinnaanngilai.

- Innuttaasut taamannak meeqqatut pineqaannarniarnerlutik? Allaanngilaq tassa maannakkut naalakkersuisugut ima innuttaasuminnut oqaluttut: Naamik attussanngilat, uloriarnarpoq, soorlulimi meeqqat mamakujunnik attuitinnaversaakkat nerriviup qaavaniittunik, taanna uparuaavoq.

Atuaruk: Siunnersuut: Imigassanik akikilliisoqartarunnaassaaq

Namminersortut nungusarniaraat
Naalakkersuisut pisiniarfinni inini immikkoortuni imigassanik nioqquteqartoqartarnissaanik anguniagaqarnerat aamma Aqqalu Jerimiassenip isornartorsiorpaa.

- Naalakkersuisut pisiniarfiit namminersortut ipitinniarsarilerpaat. Namminersorlutik Oqartussat namminersortunut unammilliinnarpata kikkut suliffimmik aallarnisaarusussagamik?

- Killilersuiniarnerujussuartaarmi killormuttaaq saatitsiinnassammat, qernertuliorneq nukittorsaavigineqaannassasoq takussutissaaleriissaaq, taanna erseqqissaavoq.

Naalakkersuisut inuiaqatigiinni killilersuiniaannarnerat Aqqalu Jerimiassenip qatsutiivippaa.

- Tassa killilersuineq inatsisilersuiniarnerujussuarlu unitsinniarli, innutaasut sunik tamanik qulangersimaneqartuarniarunik nammineersinnaanerat mattukkaluttuinnarneqassaaq, oqarluartaarneq malillugu sulinata innuttaasut qitiutillugit suliniarta, Aqqalu Jerimiassen oqarpoq.

Powered by Labrador CMS