Atassut: E-sport timersuutitut taaneqartalissaaq
Kalaallit Nunaanni e-sportitut taaneqartartut pisortatigoortumik taperserneqarlutik akuerineqartariaqalersut, Atassut isumaqarpoq, tassunga tunngatillugu partii Inatsisartuni oqallisissiamik saqqummiussipput.
Computerspillit timersuutitut taaneqartalissapput, Atassut isumaqarpoq.
Fortnite, Fifa, Call of Duty Tekkenilu spillerneqaraangata timersornertut taaneqartalernissaat partiip piumasaraa.
- Nunatsinni timersornikkut peqatigiiffiit kattuffiillu tapersersorneqartarput, unammiarnissaminnullu taperneqarsinnaasarlutik. Taamatullu e-sport-i pisortatigoortumik timersoriaatsitut akuerineqarnissaa ammaffigisariaqarparput, erfalasorpullu atorlugu pikkorissortagut unammiartissinnaanngortittariaqarlugit, partii allappoq.
Nunat tamalaat akornanniunammersuarnerit
Ersarissarneqarpoq sulinerup avataatigut timersorneq erinarsornerlu sammisarineqartartut.
- Taakkunanilu piginnaasaqarnerpaat ataasiakkaat inuussutissarsiutigisinnaasarpaat, nunanullu allanukartarlutik nunarput sinnerlugu. Isumaqarpugullu e-sport, tassa spillerneq aamma taamatut periarfississinnaagipput, assersuutigalugu peqatigiiffinnut tapiisinnaaneq, angalanissanullu tapiisinnaanikkut.
Peqatigiiffiliornissamut periarfissaqarneq
- Timersuutitut akuerineqalernera imminik e-sport nunatsinni siammarnerulertinnavianngilaa, aamma toqqaannartumik nunatta unammisartussaanik pilersitsissutiginavianngilaa. Akuerineqarnerali alloriarnerussaaq siulleq, gamer-it hold-tut peqatigiiffinnilu kattussuutilernissaannut, Atassut tunngavilersuivoq.
Sermitsiaq.AG-p Kalaallit Nunaanni Timersoqatigiit Kattuffiat aperaa e-sport timersuutitut akuerineqarinnaanersoq.
- GIF’ip siulersuisuisa aallartitaasalu eSportip Kalaallit Nunaanni timersuutitut akuerineqarnissaa pillugu eqqartorsimanngilaat. Sammisaq – Kalaallit Nunaanni atorneqarnera – qulaajarneqaqqaartariaqarpoq GIF apeqqummut isummertinnagu, GIF ilisimatitsivoq.
Sammisaq Inatsisartuni maajip 28-ani oqaluuserineqassaaq.