Atassut: Uninngaannarnermut akissaqanngilagut

Atassut isumaqarpoq Nunatsinni atugarissaarneq akeqanngitsumik atuarfeqarlunilu akeqanngitsumik nakorsiarsinnaaneq ulorianartorsiulissasoq uranimut naaggaarluinnarneq atorunnaanngippat. Partii taanna talerperliusoq naalakkersuisunngortitsinermi piumasaqarsimavoq uranimut naaggaarluinnarneq atorunnaassasoq.

Atassutip illuatungiliuttut uran pillugu ilisimasat annikippallaarnerarlugit oqariartuutaat isumaqatiginngilaa.

- Uran pillugu nalunaarutit amerlasuut suliarineqarnikuupput. Aamma puugutaq itisooq nassaareqqinnianngilarput, tassami nunani allani misilittakkat takutereerpaat aatsitassat uranitallit isumannaatsumik qallorneqarsinnaasut, Atassutip siulittaasua Gerhardt Petersen Sermitsiaq.ag-mut oqarpoq.

Nunani allanisulli Nunatsinni pilersugassat amerliartorput. Utoqqaat amerliartortut sulisinnaasut ikiliartorput.

- Suliffissanik nutaanik pilersitsisariaqarpugut. Uninngaannarnermut akissaqanngilagut. Nunatsinni aatsitassarpassuaqarpoq uranitalinnik taakkulu uninngatiinnarsinnaanngilagut. Sukangasoorujussuarmik aatsitassanut inatsiseqarpugut tassanilu piumasaqaataavoq innuttaasut peqqissusaat avatangiisillu sapinngisamik innarlernaversaarneqassasut. Aamma piumasaqaataavoq aatsitassarsiorneq naammassippat nuna tikinneqarneratut isikkulerlugu qimanneqassasoq. Aatsitassanut inatsit malillugu aatsitassarsiorniat uranimik akulinnik qalliuissappata ajornartorsiutissaqarsorinngilarput, Gerhardt Petersen oqarpoq.

Taassuma aarleqqutigaa atugarissaarnerput unammillerneqalissasoq suliffissanik nutaanik aatsitassarsiornermi pilersitsisoqanngippat.

- Ullumikkut akeqanngitsumik atuarfeqarpugut, akeqanngitsumik nakorsiarsinnaalluta. Aamma isumaginninnikkut akeqanngitsumik sullinneqarpugut. Atugarissaarnerput sakkortoorujussuarmik unammillerneqalersinnaavoq aatsitassarsiornermi suliffissanik nutaanik nassaartoqanngippat, Gerhardt Petersen oqarpoq.