Atassut umimmannik kisitseqqittoqarnissaanik piumasaqartoq

Kalaallit Nunaanni qasserpianik umimmaqarnersoq qularutigineqalersimammat kisitseqqittoqartariaqarpoq.

Inatsisartuni ilaasortaq Siverth K. Heilmanna (A) taamatut isumaqarpoq.

Amerlassusaat ilisimaneqanngitsoq

Nunarsuatsinni umimmaat amerlassusaat, ineriartornerat siammarsimanerallu immikkut ilisimasalinnit nalunaarsorneqaqqammerpoq.

Umimmaat nalunaarusiorfigineqarnerat ernumatitsilersimavoq, tassa umimmaqatigiit pingasorarterutaat amerliartornersut ikiliartornersulluunniit ilisimaneqanngimat.

- Ilisimasat malillugit umimmaqatigiit 12-pput, ilisimatusartartulli oqaatigisinnaannginnerarpaat Kalaallit Nunaanni umimmaat amerliartornersut ikiliartornersulluunniit. ”Nuna angallaffigiuminaatsoq aningaasassaaleqinerlu” Kalaallit Nunaanni umimmannik kisitsinissamut killilersuisuupput, kisitsinerillu iluamik aaqqissugaanngitsorujussuusut, allagassiami atuarneqarsinnaavoq, Pinngortitaleriffik ilaatigut allappoq.

Piniartut peqataatinneqarlik

Siverth K. Heilmannip umimmannik kisitseqqittoqarnissaa tikilluaqquaa.

- Kangerlussuup nunataani, ukiuunerinnaani umimmanniartitsisarneq ukiuni marlunniluunniit eqqissisikkallarneqarnissaa aammalu takornarissanut piniartitsiviissatut nunaminertat, nunaqavissunut akornusersuutaasinnaasut amerlavallaannginnissaat nalilersussallugit isumaqarpunga.

- Kisitsisoqarniarpat tikilluaqqunarpoq, Kangerlussuulli nunataani umimmaat qanoq illikartigisimanerat paaserusunneqarpat atuisut suleqatigineqarniarlik, aningaasassaaleqinerit suleqatigiilluarnikkut anigorneqarsinnaasarmata , Siverth K. Heilmann oqarpoq.