Atassut talerpimmut sanguvoq - Siumut saamimmut
Atassummi siulittaasup Aqqalu C. Jerimiassenip marlunngormat ualikkut Erik Jensenimik ataatsimeeqateqarnini pissarsissutigivallaanngilaa, oqaatigalugulu piffissaanngitsukkut qinersisitsinissaq avaqqunneqarsinnaanngitsoq.
Siumumi siulittaasoq Erik Jensen marlunngormat ualikkut marlunut isumaqatiginninniarnermik unitsitsivoq, tamanullu nalunaarutigalugu amerlanerussuteqarluni naalakkersuisooqatigiiliorniarneq iluatsinneqanngitsoq.
Aamma atuaruk: Erik Jensen: Aqqut toqqagarput malipparput
Tusagassiortunik katersortitsisoqareersoq Atassummi siulittaasoq Aqqalu C. Jerimiassen ataatsimeeqatigineqarpoq, aamma ataatsimeeqateqarnermi tassani Erik Jensen taperserneqanngilaq, tamannalu tupaallaatigivallaanngilaa.
Tunngaviusumik naleqartitat assigiinngitsut
- Malunnarpoq Atassut Siumullu assigiinngitsunik tunngaviusumik naleqartitaqartut. Atassut aamma piffissami kingullermi pingaartitatoqqaminut uternikuuvoq talerpimmullu nikinnikuulluni, Siumulli sammerliunerulersimavoq, Atassummi siulittaasoq tusagassiorfinnut nalunaaruteqarnermini oqarpoq, eseqqissaassutigaali sammisassat ilaannik partiit taakku marluk suleqatigiissuteqarsinnaasut.
Siumut novembarip qaammataani nuna tamakkerlugu ataatsimeersuarami saamiup tungaanut sangusimanerani, Atassutip ikinnerussuteqarluni maanna naalakkersuisooqatigiinnut ilanngunnissamut naaggaarsimaneranut politikkikkut siunnerfiit assigiinngippallaalernerat pissutaatinneqarpoq.
- Qinersisoqarnissaa maanna avaqqussinnaanngilarput, Aqqalu C. Jerimiassen erseqqissaavoq.
Aamma atuaruk: IA-p Siumut itigartippaa - qinersinissaqqanilliallappoq