Aleqap atornerluinera
Atassut: Steen Lynge tatigaarput
Naalakkersuisuni kikkut aningaasanik atornerluisimanersut aviisi AG saqqummiussivoq. Taamaakkaluartoq Atassutip parteeqatertik suli tatigaat
Peqqissutsimut angallannermullu naalakkersuisuusimasoq Steen Lynge nunatta karsianut akiligassaqartoq AG ilaatigut allaaserisaqarpoq. Naalakkersisoqarfiup kukkussuteqarsimanini nassuerutigalugulu akisussaaffik tamakkiisumik tigusimagaat misissuinermi aamma ersersinneqarpoq. Atassutip nalunaarutigaa Inatsisartunut qinigassanngortittoq Steen Lynge tatigalugu.
AG aamma aviisimi allappoq naalakkersuisunut ilaasortaasimasoq Martha Lund Olsen nunatta karsianut akiligassaqartoq. Martha Lund Olsenilli nalunaarutigaa akiligassaqarnani.
Allaffissornikkut kukkusoqarsimanera Atassummit ajuusaarutigineqarpoq. Steen Lyngep akiligassani akilereerpai. Aamma Steen Lynge nammineerluni oqartareerpoq naalakkersuisoqarfik akiligassanik nassiussissasoq.
Taama pisoqarnera pissutaalluni Steen Lyngep Inatsisartunut qinigassanngortinnini attatiinnarpaa.
- Nalornissuteqanngilanga, Atassut sinnerlugu inuiaqatigiinnik sullisseqqikkusullunga sassarpunga, nalunalugu pitsaasup tungaanut allanngeqataasinnaassuseqarlunga qinersisartut saaffigaakka imminut tunniullunga, Steen Lynge oqarpoq.
Atassutip siulittaasuata Knud Kristiansenip nuannaarutigaa Steen Lynge sassarnissaminik nalunaaruteqarmat kiisalu pisoq naalakkersuisoqarfimmit nalunaarutigineqarsimasoq kukkuluttortoqarsimaneranik.
Aviisi AG ataani pisiarineqarsinnaavoq. Naalakkersuisuusimasut kikkut aningaasanik taarsigassaqarnersut ilaatigut tassani atuarneqarsinnaavoq: