partiinit nuuttartut
Atassut piumasaqaateqarnikkut partiinut nuuttarnerit unitsikkusuppai
Atassutip qinigaanermut inatsit allanngortikkusuppaa, taamaasiornikkut partiimut allanut nuuttoqartillugu partiit Inatsisartuni issiaviit pissarsiarisimasaannik annaasaqartarneq unitsinneqassaaq.
2014-imi novembarip qaammataani Inatsisartunut qinersinermi Atassut marlunnik Inatsisartunut isertitaqarpoq. Knud Kristiansen 311-nik qinersisoqartoq aamma Mala Høy Kuko 303-nik qinersisoqartoq Inatsisartunut ilaasortanngorput.
Qinigaaffiulli nalaani Atassutip ilaasortaatitani tamaasa annaavai Inatsisartunuli sunniuteqarunnaarlutik. Siullermik Knud Kristiansen 2017-imi januarip qaammataani partiimit ilaasortaajunnaarluni attaviitsunngorpoq. Partiillu Inatsisartuni ilaasortaatitaa kingulleq Mala Høy Kuko 2017-imi septemberip qaammataani Atassummit ilaasortaajunnaarluni aamma attaviitsunngorpoq.
Taakkuli tamarmik kingornatigut Siumumi ilaasortanngorsimapput, taamaasillutillu Siumut immikkut marlunnik Inatsisartuni ilaasortaatitaqalersillugu.
Taamatulli pisoqaqqinnginnissaa qulakkeerniarlugu Atassutip Inatsisartunut kommunalbestyrelsimullunniit qinigassanngortitassatik tamaasa nuunnginnginnissaannik piumasaqarfiginiarpai.
Atassut nuuttartut pillugit piumasaqaateqarniartoq
Atassummi siulittaasup, Siverth K. Heilmannip Sermitsiaq.AG-mut oqaluttuaraa, Atassummit eqqarsaatigineqartoq qinigassanngortittut tamaasa isumaqatigiissutigineqartassasut. Siverth K. Heilmann naapertorlugu Atassut sinnerlugu qinigaasimasut qinigaaffiup nalaani Atassummiit partiimut allamut nuunnissartik aalajangiukkaangassuk issiavitsik Atassummeersumut allamut tunniuttassangaat.
Imaappa partiinut allanut nuuttartut Inatsisartuniit kommunalbestyrelsimiilluunniit ilaasortaajunnaartassasut?
- Pineqartup qinersisini qimassappagit, aap taamaattariaqassaaq, Siverth K. Heilmann Sermitsiaq.AG-mut oqarpoq.
Partiinut allanut nuuttartut qinigaaffiup nalaani partiiminnit ilaasortaajunnaaraangamik qinersisiminnik uupakaasiarinnittartut, Siverth K. Heilmann isumaqarpoq.
Qinigaanermut inatsimmi peqqussutit allanngortikkusukkai
- Partiitoqaavugut ukioq manna 40-nngortorsiortussaq. Taamaakkaluartoq Inatsisartut Allattoqarfianut atsiornernik katersinialeratta partiinut nutaanut atugassiamik immersuisariaqarsimavugut, Siverth K. Heilmann oqarpoq Atassulli partiitut suli kommunalbestyrelsimi ilaasortaatitaqartoq tikkuarlugu.
Partiip Inatsisartunut qinersisoqarnissamut qineqqusaarutissai naammassilertut, aammalu partii Ilulissani, Maniitsumi, Nuummi Kujataanilu qinersisoqarnissaanut qinigassanngortikkusuttoqarnera, Siverth K. Heilmannip aamma paasissutissiaraa.
- Kim Kielsen qinersinissamik suaarutiginnissinnaanngorpoq, Siverth K. Heilmann nuannaarluni neriuuteqarluarlunilu oqarpoq.
Atassut, Nunatsinni partiini pisoqaanersani tulliusoq, ukioq manna aprilip 29-ani ukiuni 40-nngortorsiussaaq.