Retorik
Atassut: Peqqissimissuteqanngilagut
– Atornerluinermut katsorsartinneq akisuvoq nukinnillu pisariaqartitsilluni. Imertut kuuinnartutut akeqanngitsutut neqeroorutaanngilaq. Oqaaseqaatini Atassutip taamatut nassuiarpaa
– Inuit katsorsartinnertik naammassiinnavillugu festertartut qatsuteqaakka.
Pingasunngormat Inatsisartuni atornerluinermut katsorsaaneq pillugu oqallinnermi Atassut tunuliaqutaralugu Inatsisartunut ilaasortaq Gerhardt Petersen taamatut oqarpoq.
Taamatut oqarnera IA-meersut Mimi Karlsenip Agathe Fontain-illu narrujuumminartippaat, pissutigalugu imigassamut atornerluinermut katsorsartinneq feriarnerunngimmat.
– Sumilluunniit siunertarinngilarput narrujuummisitsinissarput, politikkikkulli anguniagaraarput inunnuty imigassamik attuumassutilimmik ajornartorsiutilinnut nappaatilinnullu sinaakkutassanik pitsaasunik ikiuiniutissanillu pilersitsinissaq. Tamannali peqatigalugu ilumoorpoq arlalinnik inoqartoq imigassamik atornerluinermut katsorsartikkaluarlutik katsorsartinnermik kingorna atornerluinermut uteqattaartartunik tamannalu pissutigalugu katsorsarteqqittariaqartartunik, pissutsillu tamakkua kalaallinut inuiaqatigiinnut nukinnik atuinarput akisullutillu., Siverth K. Heilmann Atassutip akissutaatut nassuiaavoq.
– Taamaattumik aamma katsorsaanermut neqerooruteqarnermut politikki maanna atuuttoq apeqquserparput, qulaajartikkusupparput qanoq kukkusumik iliornerluta aammalu manna tikillugu qanoq pitsaanerusumik iliorsinnaanerluta, aamma mianersoqqusivugut innersuussutigalugu pisortanit inuit ataasiakkaat namminneq inuunerminnut akisussaaffiannik arsaassanngikkivut, Siverth K. Heilmann allappoq, taannalu isumaqarpoq pissutsit eqqortumik taagortariaqarivut:
– Ajornartorsiutit qanorluunniit qanorluunniit kusassarniartigaluarutsigik, ilaatigut oqaatsinik kusanartunik, taava tamatta nalunngilarput amerlasuut imigassamik atornerluinerminnut katsorsarteqattaartartut namminneq akilinngisaminnik, tamannalu pissutigalugu mianersoqqussutigaarput isumaqartoqassanngitsoq katsorsartinnissamik neqeroorutit imertut kuuinnartut akeqanngitsuunngitsut, tassami katsorsaanerit akisuujummata nukinnillu atuinartuullutik.
Aamma atuaruk: "Qanoq-una oqarpit, Gerhardt?"
Tamatuma saniatigut Siverth K. Heilmannip ersqqissarpaa oqaatigineqarsimasut aalajangiusimagitik:
– Alianarpoq aningaasat katsorsaanermut kinguneqanngitsumik atorneqartut pitsaanerusumut atorneqarsinnaagaluarmata. Katsorsartinnissamik neqeroorutit akisuujupput nukinnillu pisariaqartitsillutik. Neqeroorutaanngillat imertut kuuinnartutut akeqanngitsut, taanna oqarpoq.