Aleqap atornerluinera
Atassut: Naalakkersuisooqatigiinnermik isumaqatigiissut nutaaq ilutsinni oqaloqatigiissutigaarput
Partiip siulittaasua Knud Kristiansen Atassutip Naalakkersuisuuffissaanik nutaanik nalunaaruteqarnissaminut tunuarsimaarpoq
– Atassutip iluani aammalu naalakkersuisooqatigiinni naalakkersuisooqatigiinnissamut isumaqatigiissut nutaaq maanna isumaqatigiinniutigineqalereerpoq. Taamaattumik Atassutip Naalakkersuisuni naalakkersuisuuffissaanut nutaanut atatillugu oqaaseqarumanngilanga.
Taamatut sapaatiummat ullaakkut Sermitsiaq.AG-mut oqaluttuarpoq Atassutip siulittaasortaava Knud Kristiansen.
Tamanna pivoq Naalakkersuisut siulittaasuat Aleqa Hammond arfininngormat unnukkut Nuummi tusagassiortunik katersortitsinermi oqaluttuareersoq Naalakkersuisuni allanngortitsisoqassasoq.
– Naalakkersuisooqatigiinnermik isumaqatigiissut nutarterneqassaaq, oqartussaaffeqarfiillu ilaat allanngortissavagut. Suliaq tamanna maanna aallartinneqassaaq, Aleqa Hammond tusagassiortunut ilaatigullu Knud Kristiansenimut oqaluttuarpoq.
– Atassut oqartussaaffeqarfinnik, Naalakkersuisutut akisussaaffigerusutaminik, peqannginnami?
– Oqareernittut kissaatigisatsinnik suli oqaaseqarumanngilanga, isumaqatigiinniarnerit suli ingerlammata aammalu ataatsimeersuarnerput suli ingerlalluni.
– Qaqugu naatsorsuutigaajuk isumaqatigiinniarnerit nanginneqassasut?
– Ataatsimeersuarnermit imaqarniliorneq utaqqissavarput naalakkersuisooqatigiinni oqaloqatigiinnerit isumaqatigiinniarnerillu nanginneqannginnerini. Tamanna qanittukkut pissaaq, Knud Kristiansen, arfininngormat Atassummi nutaamik siulittaasunngortoq, akivoq.
Taanna 19-inik taaneqarpoq, manna tikillugu siulittaasuusimasoq Gerhardt Petersen tallimanik taaneqartoq.
Atassutip ataatsimeersuarnera sapaatiuppat naassaaq.