Atassut: Maanna nassuiaasariaqalerputit, Juliane

Nunafondenimi aningaasartuutinik isornartorsiuisunut Atassut ilanngupppoq. Qinigaaffimmi kingullermi siulersuisuni ilaasortat akissarsiaat qaffarujussuarput. Maanna Atassut piumasaqarpoq aningaasaateqarfiup siulittaasorisimasaa Juliane Henningsen Inuit Ataqatigiinneersoq nassuiaateqassasoq.

Nunafondenimi siulersuisut akissarsiaat katillutik 2009-mi 135.000 koruuniupput. Taakku marloriaat sinnerlugu amerlimapput ukiormannami siulersuisunut aningaasartuutit 300.000 koruuninut amerlisimapput.

Aningaasartuutit taama qaffarujussuarsimanerat siulersuisuni siulittaasuusimasup Juliane Henningsenip nassuiaateqarfigisariaqaraa Atassut isumaqarpoq.

Nassuiaasariaqarpoq
- Atassummiit erseqqissaatigissavarput Inuit Ataqatigiit siuttuunerisa nalaani siulittaasuutinneqarsimasup Juliane Henningsen-ip nassuiaateqartariaqarnini avaqqussinnaanngikkaa aammalu inuttut imminut iluaqusersorniarnermut aningaasaateqarfimmik atuisimaneq nassuerutigisariaqaraa isumaqarluinnaratta, Atassutip siulittaasua Gerhardt Petersen tusagassiutinut nalunaarummini allappoq.

Atassut aamma isumaqarpoq Nunafondenimi akissarsiat appartinneqartariaqartut, isumaqarpummi Inatsisartut ilaasortat siulersuisuni ilaasortaatinneqartut Inatsisartuni naammaginartunik akissaateqartinneqareersut.

Atassut imatut piumasaqarpoq:

• Siulersuisut akissarsiaqartitaanerat appartinneqassasoq
• Ingerlatsinermut aningaasartuutit appartinneqassasut, matumani aamma ajunngitsorsiassat biileqartitaanermut, feriarnermi akissarsiaqartitaanermut, feriarnermi akiliunneqartarnermut tunngasut ilanngullugit
• Aningaasat suliniutinut assigiinngitsunut agguaanneqartartut siulersuisunut akissarsiaqartitsinerup apparneqarnerata aammalu ingerlatsinermut aningaasartuutit apparneqarnerisa nalinganik qaffanneqassasut

Juliane suli nipaappoq
Atassut ilanngullugu nalunaarpoq maanna siulittaasoq Per Berthelsen Siumumeersoq tatigigitsik akissaatit naammaginartumik inissinnissaannik isumaginnissinnaassasoq.

Sermitsiaq.AG-mit Juliane Henningsen oqaaseqartinniarsimagaluarparput taannali ilisimatitsivoq kingusinnerusukkut saaffiginnikkumaarluni.