kommunimut qinersineq

Atassut Kujalleq: Isumaginnittoqarfik sammineqarpallaartoq

Kommune Kujallermi inuussutissarsiutinut siunissaq pillugu eqqartuinngippallaartoq, Atassut Kujalleq isumaqarpoq

Kommune Kujallermi inuussutissarsiutinut siunissaq pillugu eqqartuinngippallaartoq, Atassut Kujalleq isumaqarpoq

- Kommuneqarfik Kujallermi qineqqusaarnermi isumaginnittoqarfik sammineqarpallaarpoq.

Kommuneqarfik Kujallermi kommunalbestyrelsemut qinigassanngortittoq, Bentiaraq Ottosen (A) taama oqarpoq.

Kommunimi inuussutissarsiornikkut ineriartortitsinissaq eqqartorneqartariaqartoq, Atassut isumaqarpoq.

- Innuttaasummi suliffissaqarnerulerpata isumaginnittoqarfiup suliassai ikileriassapput. Politikerit suliffissanik eqqarsartariaqalertut, Bentiaraq Ottosen oqarpoq.

Akileraarut appartillugu

Atassutip Kujataani akileraarut procentimik ataatsimik apparneqarnissaa qineqqusaarutigaa.

- Kujalleq soqutiginarsassuarput. Suliffiit nutaat pilersinneqarnissaat ammaffigissavarput soorlu aalisakkerinikkut aatsitassarsiornikkullu. Taamalu pisoqarpat kommunip kaaviiaartitai amerleriassallutik, Bentiaraq Ottosen oqarpoq.

Pilersaarutit piviusorsiortut

Innuttaasunut naleqquttumik suliffinnik pilersitsisoqartariaqartoq, Bentiaraq Ottosen isumaqarpoq.

- Kommuneqarfik ukiunut sisamanut anguniagaqarnissaa kaammattuutigaarput. Kommuneqarfimmilu Atassut suleqataarusuppoq.

- Kommune piviusorsiortunik pilersaaruteqassaaq pilersaarutinilu pingaanerpaassaaq najugaqarfinni tamani tassa illoqarfinni, nunaqarfinni savaateqarfinnilu suliffissat amerlanerit pilersinneqarnissaat.

Powered by Labrador CMS