Skip to main content

Atassut Demokraatillu suleqatigiilersut

Atassut IA-p Naleqqallu naalakkersuisooqatigiinnerannut tapersersortaajunnaarluni Demokraatillu suleqatigiilerput, taamaalilluni Siumut kisimi illuatungiliuttunngorpoq.

Partiit talerperliusut imminnut akerlilersorunnaassaaput. Atassutip siulittaasua Aqqalu Jerimiassen, partiip IA siuttoqaralu naalakkersuisooqatigiinnut tapersersortaajunnaarnerata kingorna taamatut oqarpoq.

- Naalakkersuisooqatigiimmi saamerliusupilussuarmik politikkeqarnerat uagutsinnut erseqqilluinnarpoq. Soorunami innuttaasunit amerlanerussuteqartunit taaguunneqarsimanerat ataqqivarput, partiitulli tapersersuisuujuassagutta tamanna taakkununnga uagutsinnullu pakatsinartartussaavoq.

Pakatsisarneq ukiakkut ataatismiinnermi marlussoriarluni saqqummertarsimavoq, soorlu Atassut ataatsimiititaliami suliaqarnermi naalakkersuisooqatigiinnut akerliusarsimasoq. Ilaatigut ajunngitsorsiassanut akileraarutit qaffanneqarniarnerat pillugu suliamut Atassut akerliusimavoq, qaffaaniarnermi inuiaqatigiinni atugarissaarnerusunut - tassa Atassummut qinersisartunut eqquinerusussaammat.

- Talerperliunerusutut politikkerput erseqqarinnerutikkusupparput, Atassut Demokraatillu imminnut tapersersoqatigiittalerlutillu talerperliunerusut naleqartitaannik peqatigiillutik sorsuuteqartalissapput, Aqqalu Jerimiassen nalunaaruteqarnertik pillugu Sermitsiaq.AG-mut oqarpoq.

Killilersuisarnermut sanilliullugu periarfissaq alla

- Oqaluttuarisaanermi siullerpaamik partiit talerperliit ataatsimoorlutik suleqatigiilerput, Jens-Frederik Nielsen nutaamik suleqateqalerneq pillugu Facebookikkut allappoq.

Siumumi partiit talerperliunerusutut illuatungiliuttut avataaniilerneq kamaatigineqanngilaq.

- Demokraatinik oqaloqateqarluartarlutalu suleqateqarluarsimavugut. Matumik matorluisoqanngilaq, taamaammat ataatsimiititaliani teknikkikkut suleqatigiikkunnaaraluarluta suleqatigiilluarnerput ingerlatiinnaasavarput, Erik Jensen Sermitsiaq.AG-mut oqarpoq.

Ataatsimiititalini ilaasortat allanngortinneqassasut 

Atassut naalakkersuisooqatigiinnut tapersersortaasutut Aningaasaqarnermut Akileraartarnermullu Ataatsimiititaliami kiisalu Inuussutissarsiornermut Aatsitassanullu Ataatsimiititaliami pingaarutilimmik inissisimasimavoq, ataatsimiititalini pineqartuni Atassut naalakkersuisooqatigiinnut amerlanerussusiisarsimalluni.

Atassutip ataatsimiititaliani pineqartuni issiatitaqarunnaassaaq, ullumikkullu immikkut ittumik ataatsimiittoqarnerani illuatungiliuttutut partiit pingasuusut akornanni inissat qanoq agguaanneqassanersut aalajangiiffigineqassalluni.

Atassutip siulittaasuata oqaatigaa, inissat taakku marluk partiimut pingaaruteqarpallaanngitsut.

- Ataatsimiititaliami ataatsimi naalakkersuisooqatigiit ikinnerussuteqaraluarunilluunniit Inatsisartuni amerlanerussuteqarnermikkut anguniakkatik aalajangiiffigisartussaavaat, taanna oqarpoq.

Pingaarnerpaasoq tassaavoq, partiit talerperliusut tamarmik immikkut partiinik saamerliusunik tapersersuisannginnissaat, akerlianilli talerperliunerusutut politikkimik ataatsimoorffeqartarnissaat pingaarnerulluni, Aqqalu Jerimiassen oqarpoq.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER