Atassummit qinigassanngortittoq: Suliffeqarfimmik aallartitsinissaq ajornannginnerussaaq
Avannaata Kommuniani borgmesterip sinnissaa siulleq Aqqalu Jerimiassen (A), Inatsisartunut qinigassanngortippoq. Taanna isumaqarpoq, suliffeqarfimmik aallartitsiniartut oqilisaaffigineqassasut
Ukioq kingulleq kommunimut qinersinermi Aqqalu Jerimiassen (A) 530 qinerneqarlu angusarissaarpoq. Kommunimut qinersinerup kingorna taanna Avannaata Kommuniani borgmesterimut siullertut sinniisunngorpoq.
Massakkullu Inatsisartunut qinigassanngortippoq. Taassuma Nunatsinni suliffeqarfimmik aallartitsinissaq ajornannginnerulersinniarlugu selskabsskattip appartinneqarnissaa sulissutigerusuppaa.
- Suliffeqarfimmik aallartitsiniarneq tukassinnaavoq. Tamanna oqilisaaffigineqarnissaa sulissutigerusuppara, namminiilivikkusukkuttami suliffeqarfiit namminnersortut pisariaqartippagut, Aqqalu Jerimiassen Sermitsiaq.AG-mut oqarpoq.
Pisariaqartitsineq malillugu appartitsiartorneq
Taamaammaat taassuma siunnersuutigaa, selskabsskattip 30 procentimiittup appartinneqarnissaa.
- Imaasiallannikkut selskabsskat 10 procentimik appartinneqassanngilaq. Pisartiaqartitsineq malillugu kisitsit ukiumiit ukiumut appartikkiartorneqarsinnaavoq. Siullermik 29 procentimut appartinneqarnissaa siunnersuutigisinnaavara, taanna erseqqissaavoq.
Oqartussaaffinnik tigusineq
Aqqalu Jerimiassenillu oqartussaaffiit tiguneqarnissaat ilanngullugit sulissutiginiarpai.
- Maannakkullu inatsiseerarpassuit atuuttuusut Europamiut inooriaasiannut tulluunnerusut malikkunnaarlugit Fødevarestyrelsimiik suliarineqartartut angerlaakkiartuaarsinnaanerat eqqarsaatigisariaqalerparput uagutsinnut tulluuttunngoorsarlugu, piviusorsiunngeqaarmi qangaaniilli ilitsoqqussatupajaaq pigisagut piniartuakkagut pisinarfinnut tunisinnaajunnaarnikuutitaagingulluunniit,
mattak piumaneqartaqisoq amiilaarnaannartumik maanna akisuvoq, tassalimi inatsisigut tamakkununnga tunngasut eqaruttormata.
Marlunnik qinigaaffeqalersinnaasoq
Aqqalu Jerimiassen Avannaata Kommuniani kommunalbestyrelsimut ilaasortaanini pissutigalugu Inatsisartunut qinigaangaluaruni marlunnik qinigaaffeqalissaaq. Taassumali ajornartorsiutitut isiginngilaa.
- Tamanna partiimit isummerfigineqarnikuunngilaq, qinigaasummi tamanna aamma nammineq akisussaaffigaa. Kommunalbestyrelsimilu ataatsimiititaliani siulittaasuuffeqannginnama marlunnik qinigaaffeqarnissaq isumakuluutiginngilara, Aqqalu Jerimiassen oqarpoq.