kommunimut qinersineq
Atassummit kaammattutt: Pisuuteqattaakkunnaarluta suleqatigiitta
Partiit suleqatigiilluarnerisigut Kommune Avannarlinngortussaq angusarissaarnerpaasinnaasoq, Qaasuitsup Kommuniani Atassut isumaqarpoq
Ulloq 1. januar 2018 Qaasuitsup Kommunia avinneqassaaq
Kommuni avannarlermi illoqarfiit ukuussapput: Ilulissat, Upernavik, Uummannaq kiisalu Qaanaaq. Kommunilu kujallermi illoqarfiit ukuussallutik: Qasigiannguit, Qeqertarsuaq, Aasiaat kiisalu Kangatsiaq.
Kommuneqarfiup avinneqarnissaa inuttaasunut sunniuteqartussaavoq. Taamaammat politikerit qaninnerusumik suleqatigiinnissaat pisariaqarpoq, Atassut Avannaan sinnerlugu, Aqqalu Jerimiassen, oqarpoq.
Atuaruk: Qaasuitsup kommunia avinneqalerpoq
Pisuuteqattaanneq unitsilli
- Atassummiik partiit tamaasa kaammattorusuppagut pisuutitseqattaannerup unitsinneqarnissaa. Kommunissatsinnimi Qaasuitsoq Avannarlermi tikkuartuunneq pisariaqartinngilarput, tusagassiuutinut nalunaarusiamini allappoq.
Taassuma partiinut kaammatuutigaa imminut tikkuartuunneq unitsillugu suliniutinik saqqummeeqqullugit.
- Allatut isumaqarsinnaaneq pitsaaquteqarpoq. Oqariartuutilli ataatsimoorfigalugit innuttaasunut sinaakkusiissaagut. Ataatsimoorussilluta kommunip kivinnissaa sulissutigitigut, Jerimiassen oqarpoq.
Atuaruk: Avannaata siunissaa neriulluarfigineqartoq
Tamarmik peqataatinneqassapput
Illoqarfiit tamarmik ineriartortinneqarnissartik pisariaqartippaat.
- Qaasuitsunngornitsinniilli tusakulavallaarsimaqaarput oqaaseq "Ilulissat kisimi ineriartortinneqarpoq". Tamannalu ikaarsaariarnermut ataatsimiitsitalianngortussap suliassarissavaa pingaarutilik. Illoqarfiillu tamarmik ineriartortinneqarnissaat sulissutigineqassalluni, Jerimiassen tikkuaavoq.
Avannaanilu aalisarnikkut takornariaqarnikkulli periarfissaginnerpaasoq oqaatigaa.
- Taakkuuppulli aamma taamaallaat suleqatigiilluarnikkut immitsinnut ajattuunnikkuunngittoq qaqinnerusariaqakkagut, qiningaalersussat innutaasuminnut toqqissisimanermik pilersitsissagunik periarfissatuaalerpoq partiit akimorluinnarlugit suli ingerlanneqassasoq, piffinni qinikkat suleqatigilluinnarnerisigut, minnerunngitsumillumi nunaqarfinni aqutsisut naalaarluarnerisigut avannaani inuussutissarsiorneq pitsaanerpaaffissaminut pisinneqarsinnaavoq, Aqqalu Jerimiassen oqarpoq.