Atassummi siulittaasoq nassuiaanianngikkallarpoq
Naalakkersuisunut siulittaasup Kim Kielsenip marlunngornermi Atassutip naalakkersuisoqatigiinnit tunuarnera ilisimatitsissutigimmagu, Kim Kielsenip minnerunngitsumik Atassummi siulittaasoq Siverth K. Heilmann tupaallatsippaa.
Nalunaarutip aatsaat aqagu pingasunngornermi saqqummiunneqarnissaa, Atassutip pilersaarutigigaluarpaa, tamannalu pillugu Kim Kielsen ippassaq unnukkut nalunaarfigineqarpoq.
Naalakkersuisoqatigiinnit tunuarnissinnut suna tunngavilersuutigaasiuk?
- Maanna akissuteqarnianngilanga. Utaqqilaartariaqarputit. Gruppimi ataatsimeeqqaalaartussaavugut, Inatsisartut ataatsimiittarfianni politikerit unikkallarneranni, Siverth K. Heilmann, Sermitsiaq.AG-mut taama ilisimatitsivoq.
Tupatsinneqartut
Atassutip aalajangernera pillugu Kim Kielsenip nalunaaruteqarnera Atassummi ilaasortat tupaallaatigigaat qularutissaanngilaq, taakku ukioq ataaseq Kim Kielsen siuttoralugu naalakkersuisoqatigiipput.
- Gruppimi ataatsimeereerutta aalajangernitsinnut tunuliaqutaasoq oqaatigissallugu neriorsussavakkit, Siverth K. Heilmann, maanna avatangiisinut naalakkersuisuujunnaartoq taama ilisimatitsivoq.
Aqqaluk Heilmann aamma Bentiaraq Ottosen sinniisutut Inatsisartunut ilaasortaajunnaartariaqarnerinik aalajangerneq kinguneqarpoq, taakkulu inissaq naalakkersuisuusimasunut Aqqalu Jerimiassenimut aamma Siverth K. Heilmannimut tunniullugu.
Naalakkersuisoqataaneq partiimut akisusimasoq, siulittaasup tullia Qulutannguaq Berthensen tusagassiuutinut nalunaarummi ilisimatitsivoq.