Ataqqinaammik doktori: Namminiilivinnissaq sinnattuaqineruvoq

Namminersorneq pillugu Isumalioqatigiissitami siulittaasuusimasup Ilisimatusarfimmilu ataqqinaammik doktorinngortinneqaqqammersup, Jakob Janussenip, ullumikkut namminersulivinniarnermut ''isumaqatissarsiortut'' sunik anguniagaqarnerat paasisinnaanngilaa.

Jakob Janussen soraarninngorluni Danmarkimut nuunnikuugaluarluni, Kalaallit Nunaata siunissaa pillugu oqallittoqartillugu akuliutinngitsoorsinnaanngilaq.

Jakob Janussen ukiorpassuarni qullersanut ilaalluni atorfilittaasimasutut kalaallit inuiaqatigiit ilisimasaqarfigilluarpai. Naak maanna soraarninngorluni Danmarkimut nuunnikuugaluarluni, Kalaallit Nunaata siunissaa pillugu oqallittoqartillugu akuliutinngitsoorsinnaanngilaq. Tamanna aviisimi AG-mi apersorneqarnerani atuarneqarsinnaavoq.

Cirkusimi hiistitoqaq

- Kisianni cirkusimi hiistitoqqatut qisunnik pilattornerlukunik naammasaqartutut ippunga. Inuiaqatigiit ineriartornerannut taamak ititigisumik peqataareersimalluni, imaaliallaannaq inuulluaqqusiinnartoqarsinnaanngilaq, Jakob Janussen, namminiilivinnissaq pillugu oqallinnermut akuliunnissaminut qununngitsoq oqarpoq.

- Aqagu aqaguaguluunniit Kalaallit Nunaata namminersulivissinnaaneranut isumaqataasunut ilaanngilanga. Soorunami inatsisinut tunngassuteqartut inisseqqaarneqassapput, kisianni aamma piumasaqaatit allat inissinneqartussaapputtaaq. Nuna Kalaallit Nunaattut ittoq allanik isumalluuteqartuassaaq, aamma nunamut sakkutooqarnikkut sanngiitsumut, ilanngulluguttaaq 3-4.000 kilometerinik ungasitsigisumi inissisimasumut, kitaani sanilerujussuatsinnut naleqqiullugu, isumalluuteqarusunneruvunga, Jakob Janussen ullumikkut namminersulivikkumasunut isumaqataavallaanngitsoq oqarpoq.

Sinnattuaqineq

- Isumaqarpunga tamakku imminut takorloortitsineruinnartut. Navianarluinnartumik angusiniartoqarpoq. Kalaallit Nunaat aningaasatigut sulisussatigulluunniit naalagaaffimmik namminersortumik ingerlatsinissamut nukissaqanngilaq. Ullumikkut namminersulivinniarnermut isumaqatissarsiortut sunik anguniagaqarnerat paasisinnaanngilara. Ilaanni ilisimasakittutut pasisarpakka – tassami taamaanngippat taamarsuaq isumaqatissarsiornavianngillat. Oqariartuutit akikinaarinerupput, tamannalu pissuteqarpoq qinersisartarpassuit pissutsit qanoq ivinnerannik paasiuminaatsitsimmata, Jakob Janussen oqarpoq.

Jakob Janussenip apersorneqarnera tamaat aviisimi AG-mi netsikkut saqqummiunneqartumi tamaat atuaruk. Linki una aqqutigalugu iserfigisinnaavat:

Powered by Labrador CMS