Atammimmi tunillatsissimasoqanngilaq

Atammimmi innuttaasut arfininngormat misissortinnissamut neqeroorfigineqarput. Covid-19-imut misissuutit tamarmik tunillatsissimannginnermut takutitsisut oqartussat ilisimatitsipput.

Atammimmi Covid-19-imik tunillatsissimasoqanngilaq.

Atammimmi innuttaasut sapaatip akunnerata naanerani misissortinnissamut neqeroorfigitereersullu tamanna paasinarsivoq.

- Maanna misiligutit Atammimmeersut misissorluarneqareerput, misissuinerillu takutippaat Atammimmik tunillatsittoqarsimanngitsoq, corona pillugu suleqatigiit nittartakkaminni ilisimatitsipput.

Nuummi tunillatsissimasut ilaat ataaseq Maniitsup nunaqarfiini Atammimmi aamma Kangaamiuni angalaarsimasoq paasineqareersorlu, nunaqarfinni marlunni innuttaasut misissortinnissamut neqeroorfigineqarput.

Atammimmi innuttaasut arfininngornermi 17. juli misissortinnissamut neqeroorfigineqarput.

Kangaamiuni Nuummilu misissuisoqassaaq

Kangaamiuni innuttaasut aqagu marlunngornermi 20. juli misissortinnissamut aamma akiuussutissalertinnissamut neqeroorfigineqassasut, oqartussat ilisimatitsipput.

Nuummi innuttaasut arlalissuit aamma misissortinnissamut kaammattorneqarput. Tunillatsissimasummi arlallit tunillatsissimanerminnik suli paasisaqartigatik illoqarfiup iluani sumiiffinni inoqarfiusuni arlalinniissimapput. Nuummi misissuisarfik piffissamik inniminneeqqaarani misissuisassaaq ataasinngornermiit arfininngorneq ilanngullugu nalunaaqutaq 12.30-14.00.

Naalakkersuisut coronavirusimut tunngatillugu ullumi nalunaaqutaq 10.00 tusagassiortunik katersortitsissapput.

Powered by Labrador CMS