Ataatsimut isigalugu ingerlalluarpoq, aaaqqitassaqarporli: »Ernumanaqaaq«
Atuartut 1000-ingajaat apersuilluni misissuinermi HBSC-mik misissuinermi – peqataasimapput, ingerlalluartorpassuaqarporlu. Sulili pisoqartarpoq »pisussaanngitsunik, pisimasariaqanngitsunik ajoraluartumilli pisartunik«.
Qujanartumik atuartut amerlanersaasa ingerlanertik, ilinniartitsisutik atuaqatitillu naammagisimaarpaat.
Aviisi AG allappoq.
Taama amerlatigisut ingerlalluarnerat takullugu nuannerpoq, atuarfeqarnermut ataatsimiititaliami siulittaasoq Juaaka Lyberth (IA) AG-mut oqarpoq.
Kisianni.
Kisiannerujussuuvorlu.
Meeqqat ilaat ingerlalluanngillat, assersuutigalugu amerlaqisut ullut tamaasa ullaakkorsiorneq ajorput, sinnakittarlutik, ilaat hashimik pujortarniartarsimallutik, qinngasaaruttarnerlu annertulluni.
9.-10. klassini atuartut pingasuugaangata ataaseq sikaritsinik pujortartarpoq.
- Inuusuttut suli taama amerlatigisut pujortartarnerat ernumanaqaaq, tamattami ilisimavarput qanoq ajoqutaatiginersoq. Pinaveersaartitsinermi angajoqqaat ilaatinneqarnerunissaat pingaartuuvoq, Juaaka Lyberth erseqqissaavoq nangillunilu:
- Meeqqat atuarfimmi angajulliunerusunit, qatanngutiminnit angajulliusunit, angajoqqaaminnit ikinngutiminnillu ilinniartarput. Taamaattumik sikaritsinik pissarsisinnaannginnissaat akisussaaffigaarput. Niuertarfinni meeqqat sikaritsinik piseqqusaanngillat. Taamaakkaluartoq tupamik pissarsisinnaapput. Suminngaaniit? Ikinngutinit angajulliusunit pisiniussisunit imaluunniit allaat angajoqqaanit? Ajornartorsiut una tamatta iliuuseqarfissavarput, Juaaka Lyberth nangilluni oqarpoq, nammineq apersortikkami sikaritsitoqqaarsimalluni, 1976-imilu pujortarunnaarsimalluni.
Aviisimi AG-mi atuarnerusinnaavutit. Aviisi uani pissarsiariuk: