Ataatsimoorussamik oqaatsit sungiusarnermi ilinniarneqassapput

Umiarsuit timmisartullu nunanit assigiinngitsunit tallimaneersut sungiusarnermi peqataalerpata, assigiimmik oqaatsinik atuinissaq pingaaruteqarluinnarpoq. Nunallu pingasut annaassiniarnermi qitutinneqalerpata, oqaatsinik assigiimmik atuinissamik pisariaqartitsineq minnerulersitsinngilaq.

Sungiusarnersuaq Arctic Guardian septembarip ulluisa tallimaani aallartinneqarpat, tuluit oqaasii atorneqassapput. Peqataasussanilu USA kisiartaalluni tuluit oqaasii ilitsoqqussatut atugaraat.

- Canadamiusut-franskisulli allamiorpaluutit atorlugit tuluttut oqaluttut tusaaniarnissaat ilaatigut sungiunniangassaassapput, major Anders Johansen Isittumi Sakkutooqarfimminngaannersoq Sermitsiaq.AG-mut oqarpoq.

Sillimaninarnermut pingaarutilik

Canadamiummi umiarsuaataat sungiusarnermi peqataatinneqartussaq Canadap ilaani franskisut oqaatsinik atuisoqarfimmiit peqataassaaq. Nunat taaneqartut marluk saniatigut Islandimiut, Norgemiut, Danmarkillu umiarsuaataat aamma peqataatinneqassapput. Rusland, Sverige aamma Finland annaassiniarluni sungiusarnermi qitiullutik peqataassapput.

- Nunat assigiinngitsut sungisarnermi peqataasut attaveqaqatigiinneq sungiusangassaasa ilagaat. Ilungersornerup nalaani oqaatsinik takornartanik attaveqaqatigiinniarneq atugassat ilagaat, major Anders Johansen oqarpoq.

ATUARUK: Russit attaveqatigiinneq atortortussaarutaat Issittumi Sakkutooqarfimmi atorneqartut

Umiarsuit marluk tamarmik nunanit allaneersut annaassiniarnermi suleqatigiilluinnassangunik paaseqatigiinnissaat pingaaruteqarluinnartuuvoq. Qulimiguulilluunniit umiarsuarmut nunamit allameersumut mitsinniarnerani.

- Suleriaatsimimi sillimaniarnerup pitsaalluinnartuunissaa pingaaruteqarluinnarpoq, Anders Johansen oqarpoq.