Ataatsimoortumik tapiissutit: Borgmesterit isumaqatigiissummut atsiorusunngillat

Nunami borgmesterit Vittus Qujaukitsorlu isumaqatigiinngilluinnarput. Tamatuma malitsigisaanik aappaagumut ataatsimoortumik tapiissutissat pillugit isumaqatigiissut ataatsimut atsiorneqarsimanngilaq.

Novembarip aqqarnani borgmersterit ataatsimoortumik tapiissutit pillugit isumaqatigiissummik piaarnerpaamik atsioqquneqarsimapput. Taamaaliorusussimanngillalli, allakkami borgmesterit peqatigiillutik novembarip 15-iani Vittus Qujaukitsumut nassiussimasaanni aamma Sermitsiaq.AG-p takusimasaani tamanna takuneqarsinnaavoq.

Peqataatinneqarsimannginneq

- Kommunninit akuersaarneqarsinnaanngilaq, Naalakkersuisut kommuninut ataatsimoortumik tapissutit tunngaviisigut sipaaruteqarfiginiarlugit aalajangeqqissimanerat, tassa tassunga tunngatillugu ingerlatsinermi kommunit siusinnerusukkut ilaatinngivillugitl.

- Kommuninit aamma eqqarsarnartoqartinneqarpoq, Namminersorlutik Oqartussat ingerlaqarfii annertuut, peqqinnissaqarfik, ilaatigut sipaarniarfiginagu, kommunit ingerlataqarfii annertuut, atuarfiit isumaginnittoqarfiillu sipaarniarfigineqarnerat. Sipaarutiginiakkat taama ittut soorunami innuttaasunik kiffartuussinermut sunniuteqassapput, borgmesterit allapput.

Siumut borgmesteriutitaat pingasut aamma IA-p borgmesteriutitaat marlukk isumaqarput, ataatsimoortumik tapiissutit ikilisinneqarniartillugit “kommunit aningaasartuutigisartagaannik apparsaaniarluni” suliniuteqartoqarnissaa susassaqartut isumaqatigiissutigisariaqaraat.

Namminersorlutik Oqartussanit peqqussutit

- 2020-mut ataatsimoortumik tapiissutissatut isumaqatigiissutip ingerlanneqarnera naammaginanngitsutut, susassaqartullu akornanni isumaqatiginninniarnissamut sanilliullugu Namminersorlutik Oqartussat peqqussuteqartarnerat naammaginanngitsutut kommunit misigisimavaat. Borgmesterit taamaammat ataatsimoortumik tapiissutit pillugit isumaqatigiissuteqarnissamut peqqussutit nassiunneqarsimasut tusaatissatut tiguaat, isumaqatigiissulli atsiorusunngilaat, Vittus Qujaukitsumut allakkami tamanna erseqqissaassutigineqarpoq.

Borgmesterit missingersuutitigut suleqatigiinnissamik Namminersorlutik Oqartussanut isumaqatigiissut nutarterusuppaat.

- Kommuninit naatsorsuutigineqarpoq, missingersuutit pillugit suleqwatigiinnissamik isumaqatigiissut nutaaq 2020-mi februarip qaammataata naannginneranerani naammasissillugu suliarineqareersimanissaa. Aamma missingersuutit pillugit suleqatigiinnissamik isumaqatigiissut ataatsimoortumik tapiissutit pillugit isumaqatiginninniarnissamut malittarisassanik erseqqissunik imaqartariaqarpoq, taasunga ilanngullugu ataatsimoortumik tapiissutit pillugit isumaqatigiissutissap qaqugukkut naammassineqareersimanissaa erseqqissumik ullulerneqartariaqarpoq, nunami borgmesterit tallimat taamatut kissaateqarput.

- Kommuninit piumasarineqarniarpoq, 2021-mut kingusinnerusumullu ataatsimoortumik tapiissutissat pillugit isumaqatiginninniarnerit ukiup siuliani juunip15-iat nallertinnagu naammasillugit isumaqatigiissutigineqartarnissaat, Kiista P. Isaksen, Charlotte Ludvigsen, Ane Hansen, Palle Jerimiassen aamma Malik Berthelsen allapput.