Ataatsimoortumik tapiissutit ima peerutissapput
Naalagaaffeqatigiinni misileraaneq aallartippoq: Ataatsimoortumik tapiissutit ukiut tamaasa ikiliartortinneqarpata susoqassava? Naligiinnerulluta ataatsimuulissaagut imaluunniit nunat avissappat?
Ataatsimoortumik tapiissutit qaffannissaannik qinnuteqarnissaq silatusaarnerunersoq Kalaallit Nunaanni oqaluuserineqartoq Savalimmiuni killormorluinnaq ingerlasoqarpoq.
Tassani ikilisinneqassapput, sukkasuumik. Aviisi AG sapaatip akunnerani matumani taama allaaserisaqarpoq.
Savalimmiuni partiit naalakkersuisuutitaqartut pingasut Javnaðarflokkurinip, Tjóðveldip aamma Framsóknip naalakkersuisooqatigiinnissamik isumaqatigiissutaat naapertorlugu ataatsimoortumik tapiissutit ukiumut 25 million koruuninik ikilisinneqartassapput. Tassalu piffissami qinigaaffimmi 640 aamma 540 million koruunit akornanni annikillissallutik.
- Savalimmiuni Kalaallit Nunaannilu pissutsit assigiinngitsupilussuupput. Savalimmiormiunut ataatsimoortumik tapiissutit sillimmataapput aningaasat naleeruttarlutillu naleqarnerulertarneranni naligiissaarutaasarlutik, Kalaallit Nunaannilu assut pisariaqartinneqarlutik, ilisimatooq Ulrik Pram Gad AG-mut oqarpoq.
Ukiut 25-t ingerlaneranni Savalimmiormiut anguniagaq taanna attatiinnassappassuk naalagaaffimmit tapiissutit peerneqarsimassapput taamaalillunilu naalagaaffeqatigiinnermi qilerutit qasukkarneqarlutik. Kalaallit Nunaanni periuseq taamaattoq 2016-imi oqaluuserineqarpoq, IA siunnersuuteqarmat ataatsimoortumik tapiissutit ukiumut 10 million koruuninik ikilisinneqartassasut. Siunnersuut itigartinneqarpoq, annertuumik aatsitassarsiornikkut suliniuteqartoqarpat oqaluuserineqaqqissalluni.
Ulrik Pram Gad naalagaaffeqatigiinnermut immikkut ilisimasaqarpoq Danmarkimilu nunat tamat ilisimatusaatigineqarneranni ilisimatuujulluni, AG-llu aperisimavaa qallunaat ataatsimoortumik tapiissutinik akiliisarunnaarusunnerunersut – imaluunniit Savalimmiuni siunnersuut aarlerinaateqartutut isigineraat.
- Naalakkersuinermik suliallit ilaqarsimassajunnarsipput ataatsimoortumik tapiissutinik appaanissamik ernumassuteqartut, taamaassappammi tatiniarsinnaajunnaassavavut, oqarpoq.
Allaaserisaq tamaat AG-mi uani sapaatip akunnerani saqqummertumi atuaruk:
