Ataatsimoortumik tapiissutit 500 millioner koruuningajalluinnarnik qaffanneqartut
Ataatsimoortumik tapiissutit 2009-miilli 472 millioner koruuninik amerlisimapput, piffissarlu sivisisunngitsoq qaangiuppat danskit naalagaaffianit tapiissutigineqartartut 4 milliarder koruuninngussallutik.
Ataatsimoortumik tapiissutit taamaattuassapput. Nalinginnaasumik taama isumaqartoqarpoq. Kalaallimmi qallunaallu naalakkersuinermik suliaqartut malartitassaanatik taama oqartarput. Aningaasalli tamakkiisut qallunaat naalagaaffianit ukiumut sisamariarlutik tunniunneqartartut 2009-miilli amerliartorusaarsimapput, aviisi AG allappoq.
Danmarkimi aningaasaqarnermut ministeri Nicolai Wammen (S) oqarpoq 2020-mi ataatsimoortumik tapiissutit 3.911,3 millioner koruuniusut.
Taamaalillutik ataatsimoortumik tapiissutit tamakkiisut ukiut qulit kingulliit ingerlaneranni 1 milliardip affangajaanik amerlisimapput, tassalu 472 millioner koruuninik. Ukiup aappaata affaa ukiullu marluk qaangiuppata 4 milliarder koruunit tikinneqarsimassapput. 2009-mi 3.439,6 millioner koruuniusimallutik.
Ilisimaneqartutuut qaffattarnerannut peqqutaavoq aningaasat naalagaaffimmit akit akissarsiallu nalinginnaasumik ineriartornerat ilutigalugu iluarsiivigineqartarnerat.
Espersen: Ajalusoorfiusinnaasoq
Namminersorlutik Oqartussat pillugit inatsit akuersissutigineqarmat taamanikkut ministeriunerup Anders Fogh Rasmussenip (V) Folketingimi erseqqissarpaa aningaasat amerlassusaat allanngortinneqarsinnaanngitsoq »1 ørinnguamilluunniit« qaffanneqarani. Akinut akissarsianullu naleqqussaarneq eqqaassanngikkaanni.
Dansk Folkepartiimilli Søren Espersen naapertorlugu tamannarpiaq ajalusoorfiusinnaavoq. Innersuussutigaa novembarimi Folketingimi akuersissutigineqarmat meeqqat atugarliortut atugaat pitsanngorsarniarlugit 80 millioner koruuninik tapiisoqassasoq.
- Tamanna ajuallaatiginngilara. Inatsiseqarnikkullu isiginiassagaanni isumaginninnermut tunngasut Namminersorlutik Oqartussanit akisussaaffigineqareerput, aningaasalernissaat ilanngullugu. Namminersorlutik Oqartussat pillugit inatsimmi ersarilluinnartumik allassimasoqarpoq: Aningaasat aalajangersimasuupput. Pissutsillu torersuusariaqarput, Søren Espersen oqarpoq.
- Arlaatigut Namminersorlutik Oqartussani naammassineqarsinnaannginnera peqqutigalugu Danmarkip akiliisarnissaa ajalusoorfiusinnaavoq. Taamaalilluni ataatsimoortumik tapiissuteqartarneq tunngavissaaruppoq, Søren Espersen nangilluni oqarpoq.
Ilanngutassiaq tamaat AG-mi atuaruk – ugguuna iserfigisinnaavat: