Ataatsimoortumik tapiissuteqanngippat Nunatta karsia ukiut tamaasa juunip 13-ianni imaaruttassaaq
Taamaakkaluartoq Vittus Qujaukitsup ataatsimoortumik tapiissutit peerusuppai: - Perlernavianngilagut
Naatsorsuutit assigiinngitsorpassuarnik ilusilerneqarsinnaapput, naalagaaffilli tapiissuteqanngippat, nunap karsia ullumikkutut iluseqartilluni ukiut tamaasa juunip 13-ianni aningaasanik imaaruttassaaq.
Aviisi Sermitsiaq taama allaaserisaqarpoq.
Taama pisoqarpat inuiaqatigiinni kalaallini Namminersorluni Oqartussaqarnerup, kommunit aamma pisortat suliffeqarfiutaasa nunanut allanut naleqqiullutik inituneruffigisaanni, ikiortissaqarani unittoortoqassaaq.
Taamaattorli ataatsimoortumik tapiissutit pinngitsoorneqarsinnaanngikkaluartut suli oqallisigineqarput.
Oqaatigineqartut malunnaateqarnerit ilaat politikerimit misilittagartuumit Lars-Emil Johansenimit oqaatigineqarpoq, taassuma ataatsimoortumik tapiissutit Nunatta whiskymik puiaasaataatut taavai.
Siumut aamma Nunatta Qitornai taama sakkortusaartiginngillat, partiilli taakku marluk anguniagaat naalakkersuisoqatigiilernissamut isumaqatigiissummi ”Nunarput – ineriartorfiusoq – tamanut inissaqartitsisoq”-mi 2018-imi oktobarimeersumi oqaatigineqarpoq aningaasatigut imminut napatissinnaanissamik pilersitsisoqassasoq, ataatsimoortumik tapiissutinik pinngitsuuisinnaannginnermik minnerulersitsiaartuaartussamik. Taamaattorli allaat ukiuni makkunani aningaasarsiornerup pitsanngoriartorfiani, ataatsimoortumik tapiissutinit koruuni ataaserluunniit pinngitsoorneqarsinnaanngilaq.
Naalakkersuisut 2020-mut aningaasanut inatsisissatut siunnersuummik tallimanngornermi aggustip 9-aanni saqqummiussipput, tassani missingersuutigineqarluni 7,1 milliardit koruunit isertinneqarumaartut.
Ataatsimoortumik tapiissutit taakkuinnaallutik 3,9 milliardit koruuniupput – imaluunniit isertitat tamarmik 55 procenteraat. Isertitat allat, tamatumani ilanngullugit akileraarutit akitsuutillu, 3,2 milliardit koruuninik amerlassuseqarput – imaluunniit nunap karsiata kaaviiaartitaasa 45 procenteraat.
Aamma ingerlatat kiffartuussinerullu qaffasissusia taamaaginnarpat, nunap karsia ataatsimoortunik tapiissutitaqanngippat ukiut tamaasa juunip 13-ianni aningaasanik imaaruttassaaq. Periarfissaq alla tassaalissaaq ingerlatat kiffartuussinerillu affaannanngortinneqarnissaat imaluunniit akileraarutit akitsuutillu marloriaat sinnerlugu qaffanneqarnerat.
Vittus Qujaukitsoq, 47-nik ukiulik naatsorsukkani taakkunani qitiusumik inissisimavoq.
Ilaatigut partiimut mikisunnguamut namminiilivinnissamik anguniagaqartumut Nunatta Qitornaanut tunngaviliisuullunilu siulittaasuuvoq, ilaatigullu Naalakkersuisuni ilaasortaavoq aningaasaqarneq nunanilu avannarlerni suleqatigiinnermut akisussaasuulluni.
Allaaserisaq tamaat aviisimi Sermitsiami atuaruk – uani ataani aviisimut isissutissarsigit: