tragisk
Ataatsimik ukiulik angumminit toqutaasoq
Qaqortumi politiit angut 31-ni ukiulik tigummigallarpaat meeqqaminik toqutsisimasutut pasillugu
Qaqortumi napparsimmavik pingasunngornermi unnukkut angummit 31-nik ukiulimmit meeqqaminik toqugasumik nassarluni takkuttumit saaffigineqarpoq. Eqqartuussivimmut sassartinneqarnermini angut nassuerpoq meeqqani ataasiinnarmik ukiulik toqussimallugu.
- Angut 31-nik ukiulik nassuerpoq ataatsimik ukiulik toqqusassillugu toqussimallugu. Nammineq napparsimmavimmut ornigussimavoq napparsimmavimmullu apuunneranni paasineqarpoq meeraq toqoreersimasoq, politimestereqarfimmi unnerluussisuuneq Stine Spiegelenberg Sermitsiaq.AG-mut oqarpoq.
Angut 31-nik ukiulik maanna oktoberip aappaataa tungaanut tigummigallagassanngortinneqarpoq. Toqutsineq politiit maanna paasiniarpaat taamalu paasissutissanik amerlanerusunik tunniussaqarsinnaanngikkallarlutik.