Ataatsimiititaq 'kusassaaneq' pillugu isummissasoq

Kommuneqarfik Sermersooq suliffeqarfimmi EarthCheckimit, Nuuk piujuartitsisoq takornariarfissaqqissutut allagartalerniarlugu sulissuteqartumit sullinneqarpoqn.

Suleqatigiilersimaneq septembarip qaammataani saqqummiunneqarpoq, tassani kommunip EarthCheckip nalunaarusiaa innersuussutigalugu tusagassiorfinnut nalunaaruteqarluni oqaatigaa, Nuuk nunarsuarmi illoqarfiit pingaarnersaattut siullersaalluni piujuartitsisutut allagartartaartinneqarsimasoq.

Taamatulli oqaaseqarnermut taamaallaat tunngaviuvoq, Nuup illoqarfiit pingaarnersaattut kisiartaalluni EarthCheckimit sullinneqarsimanera. Tamanna DR-p radiokkut aallakaatitsisarfianit Detektorimit KNR-imillu paasineqarsimavoq.

Tamanna saqqummiunneqarmat Aningaasaqarnermut Inuussutissarsiornermullu Ataatsimiititami ilaasortap Inga Dóra G. Markussenip (S) tupigusuutigalugu ataatsimiititami suliassanngortissimavaa:

- Naqqiissuteqartoqassasoq

- Nuuk ornitassaqqissuutillugu nutaaliorluni nittarsaassineq arlaannaatigulluunniit akuerineqarsinnaanngilaq, taamaammat AIA-mi ataatsimiinnissami tulliuttumi oqaluuserisassanngortinneqarnissaa kissaatigaara, kommunimi politikkeri allappoq, nangillunilu:

- Tassani kommunimi allaffissornermik suliallit qanoq ilillutik taamatut “kusassaasinnaanersut (greenwash)” nassuiaasiortoqarsimanissaa naatsorsuutigaara, piumasaralugulu kommunimi pisortat kommune piujuartitsisutut ornitassaqqissuunerarlugu nittarsaassinerup ilumoortumik tunngaveqannginneranik tamanut nalunaaruteqassasut.

Greenwashing eqqunngitsunik nittarsaassisarnermut taaguutaavoq, tassani tunisassiat allalluunniit silamut mingutsitsinnginnerusutut takutinniarneqartarput.

Ilisimasallit arlallit DR-imut KNR-imullu oqaatigaat, EarthCheckip nalunaarusiaani erseqqissumik allassimanngitsoq, Nuuk qanoq piujuartitsisuunersoq. Illoqarfiummi CO2-mik aniatitsinera qiviaraanni, tamanna ilumuunngilluinnarmat:

CO2 annertungaatsiartoq aniatinneqartartoq

- Illoqarfimmi innuttaasup ataatsip aniatitsinera nunarsuarmi agguaqatigiissillugu aniatitsisarnermit 50 procentit missaannik annertuneruvoq, taamaammat tamanna tunngavigalugu isumaqarpunga, Nuuk illoqarfittut piujuartitsisutut oqaatigineqarsinnaanngitsoq, Jens Friis Lund Københavns Universitetimiittumi Sektion for Global Udviklingimi professoriusoq Detektorimut oqarpoq.

Ingerlatsivik ataatsimiititamut saqqummiussissummini allappoq, EarthCheckip nalunaarusiaanut atatillugu kommunip attaveqarnerani kukkusoqarsimaneratigut Nuuk piujuartitsissutut oqaatigineqarsimasoq, aamma allappoq nalunaarusiaq pillugu ilanngutassiat arlallit kommunit nittartagaani allanngortinneqarsimasut.

Ingerlatsivimmit suleqatigiinnermut nassuiaatigineqarpoq:

- Allagartaliussaq Nuup piujuartitsisutut oqaatigineqarnissaanut atorneqarsinnaananilu atorneqartussaanngilaq. Allagartaliussaq piujuartitsinermik suliaqarnermi sakkussaavoq, ingerlatsivimmillu nalilerneqarpoq, EarthCheckimit suleqateqarneq 'illoqarfiup attanneqarsinnaasumik ineriartortinneqarnissaanut aamma attanneqarsinnaasumik takornariaqarnerup ineriartortinneqarnissaanut iluaqutaasoq'.

Ataatsimiititaq tallimanngornermi ataatsimiinnermini suliamut isummissaaq.