Ataatsimiititap katersugaasiviup matuneqarnissaa itigartitsissutigigaa
Kommuneqarfik Sermersuumi ingerlatsiviup inassutigisimavaa, Ivittuuni Aatsitassanik Mineralinillu Katersugaasivik matuneqassasoq, katersallu Nunatta Katersugaasivianut tunniunneqassasut, tamannali politikkerinit itigartinneqarpoq.
Ukiuni kingullerni 8-9-ni katersat kommunip akiligaanik innuttaasunut naleqanngitsut toqqortinneqarnikuupput.
Kommuneqarfik Sermersuumi ingerlatsiviup tamanna tunngavigalugu kommunimi Aningaasaqarnermut Inuussutissarsiornermullu Ataatsimiititamut inassutigisimavaa, katersugaasivik matuneqassasoq katersallu Nunatta Katersugaasivianut tunniunneqassasut.
- Katersugaasiviup siunissaa isummerfigineqartariaqarpoq aningaasartuutit kulturimut tunngasut innuttaasunut naleqanngitsut ikilisarneqarnissaat eqqarsaatigalugu, aammalu katersugaasivimmi katersugaatigineqartut pigisat nunatsinni kulturikkut oqaluttuarisaanermut ujaqqerinermullu tunngasut asseqanngitsut ingerlateqqinneqarsinnaammata, ingerlatsivik allappoq.
Katersugaasivik matuneqartuuppat, kulturimut missingersuutini ukiumut 72.000 koruunit sipaarneqartassagaluarput, taakkulu sulianut allanut atorneqarsinnaassallutik.
Ataatsimiititalli ingerlatsiviup inassuteqaataa itigartissimavaa, tamatumunngalu paarlaallugu kommunalbestyrelsimut inassutigisimallugu allatut aaqqiissutissarsiortoqassasoq, tassani Ivittuut Katersugaasiviata aamma Paamiut Katersugaasiviata ataatsimoortinneqarnissaat anguniarlugu Katersugaasiveqarnermut ataatsimiititaliamut qinnuteqaateqaqqusisoqarluni.
Katersat containerini arfinilinni toqqortaatigineqartut
- Periarfissami tassani aaqqissuussaanermut ilanngunneqarsinnaavoq Nuummi Katersugaasivik. Kulturikkut oqaluttuarisaaneq ujaqqanillu katersat Ivittuuneersut Nuummi, Paamiuni Ivittuunilu ingerlateqqinneqarsinnaalissagaluarput, ingerlatsivik allappoq.
Kommuni naapertorlugu Ivittuuni Katersugaasivimmi katersaatit 2014-imili Nuummi containerini arfinilinni toqqortaatigineqalersimapput, taakkunannga pingasut kiassagaallutik. Tamatuma saniatigut maskiinat marluk silataani uninngatinneqarlutik.
Ivittuut Katersugaasivianni ujaqqat aammalu aatsitassarsiorneq pillugu kulturikkut inuiaqatigiinnullu tunngasunik oqaluttuarisaaneq saqqummersinneqartarput. Katersugaasivik katersugaasivittut akuerisatut ukiuni 2006-imiit 2012-imut atuuppoq. Akuersissut suli atuuppoq, kisiannili katersugaasivik 2013-imili aaqqissuussaasutut atorunnaarpoq.