Ataatsimiititaliat inuttalersorneqarnerat naammassineqarpoq
Ataatsimiititaliani sorlerni kikkut issiassanersut aalajangersarneqarsimatsiartut Jens Napaattooq Naleqqameersoq sulinngiffeqarnissamik qinnuteqarmat, ataatsimiititaliani pingaarutilinni siulittaasutut atuuffissat sinniisussanik inuttalerneqarput.
Jens Napaattooq Naleqqameersoq ataatsimiititaliani pingaaruteqarluinnartuni marlunni siulittaasussatut toqqarneqarsimagaluarpoq: Aalisarnermut, Piniarnermut Nunalerinermullu Ataatsimiititaliaq, Aalisarneq pillugu Ataatsimiititaliarsuup inassuteqaatai malillugit aalisarnermut inatsisissap piareersarneqarnernik suliaqartussaq, aamma Aningaasaqarnermut Akileraartarnermullu Ataatsimiititaliaq, Nunatta Karsiani aningaasanik qanoq atuisoqarneranik nakkutiginnittussaq.
Aalisarnermut ataatsimiititaliami Emmanuel Nûko siulittaasunngortinneqarpoq, Paneeraq Olsenilu Aningaasaqarnermut Akileraartarnermullu Ataatsimiititalimi siulittaasunngortinneqarluni.
Partiimi Siumumi siulttaasoq ataatsimiititalini ”oqimaattuni” marlunni siulittaasumut tullersortinngorpoq – Aningaasaqarnermut ataatsimiititaliami aamma Kukkunersiuinermut ataatsimiititaliami, Kim Kielsen Sanaartornermut Ataatsimiititaliami Suleriaaserlu pillugu Ataatimiititaliami kiisalu Qinigaanerup Misilinneqarnissaanut Ataatsimiititaliami ilaasortanngorpoq. Kim Kielsen aamma IA-meersoq Sofia Geisler peqatigalugu - Kalaallit Nunaat sinnerlugu Nunat Avannarliit Siunnersuisoqatigiiffianni ilaasortaassapput.
Sofia Geisler aamma Kultureqarnermut, Ilinniartitaanermut, Ilisimatusarnermut Ilageeqarnermullu Ataatsimiititaliami aamma Nunanut Allanut Sillimaniarnermullu Ataatsimiititaliami siulittaasunngorpoq.
Siullermeerluni ilaasortanngortoq
Nuna tamakkerlugu politikkimi Siumut sinnerlugu siullermeerluni ilaasortanngortoq Aslak W. Jensen aalisarnermut ataatsimiititaliami siulittaasumut tullinngorpoq, aamma Nunanut Allanut Sillimaniarnermullu Ataatsimiititaliami ilaasortanngorluni, kiisalu IA-mi siulittaasuusimasut Sara Olsvig Kuupik Kleistilu peqatigalugit ICC-mut aallartitatut atuuffeqassalluni
Demokraatineersoq Anna Wangenheim, Peqqissutsimut Naalakkersuisuusimasoq Ilaqutariinnermut Peqqissutsimullu Ataatsimiititaliami siulittaasumut tullersortinngorpoq, ataatsimiititaliami tassani Paneeraq Olsen siulittaasunngortoq.
Ataatsimiititalini tamani inissanik agguataarisimaneq uani takuuk:
