Ataatsimiititaliaq: Piumasaqaat tunngaviunerpaasoq malinneqartanngilaq

Ombudsmandip oqartussat inatsimmik malinninnersut nakkutigisussaavaa. Ombudsmandillu ukiumoortumik nalunaaruisaa Inatsisartuni sapaatip-akunnerani matumani sammineqarmat, politikkerit arlallit sakkortuumik oqaaseqartarlutik iliuuseqartoqarnissaa piumasaraat.

Inatsisartut Inatsisinut Ataatsimiititaliaata nalunaarusiaq sukumiisumik sammisimavaat, inassutigalugulu nalunaarusiaq Inatsisartut tusaatissatut tigussagaat. Ataatsimiititaliarli aamma sakkkortuumik isornartorsiuivoq.

Ombudsmandip oqaatigimmagu, aalajangiinerit innuttaasumut tamakkiisumik tapersiinngitsut innuttaasup tamanna qinnutigippagu innuttaasumut allakkatigut ilisimatitsissutigineqarnissaannik suliassat suliarineqartarnerat pillugu inatsimmi piumasaqaammik kommunit naammassinnittannginnerat suli siamasissumik ajornartorsiutaasoq isornatorsiuisoqarpoq.

Aalajangiineq allakkatigut nassiunneqartoq aamma tunngavilersuutitaqartussaavoq. Ombudsmandilu nunami borgmesterinut malittarisassat malinneqartarnissaat pillugu allakkatigut piumasaqaateqartaraluartoq ajornartorsiut suli atuuppoq.

- Inatsit ukiuni 25-ni ilisimaneqartoq

- Suliassat suliarineqartarnerat pillugu inatsimmi malittarisassat pineqartut maanna ukiut 25-t sinnerlugit atuutereersimalersut,suliassallu suliarineqartarnerat pillugu inatsimmi malittarisassat pisariinnerpaat tunngaviunerpaallu ilagigaat Inatsisinut Ataatsimiititaliamit oqaatigineqassaaq. Taamaammat suli malittarisassanik taakkuninnga malinnissinnaanngitsunik kommuneqarnera pillugu isumakuluuteqarnissamut Inatsisinut Ataatsimiititaliaq tunngavissaqarpoq, ataatsimiititaliaq allappoq.

Naleqqap oqaaseqartartuata Jens Napaattuup oqaatigaa, nalunaarutit tusaatissatut tiguinnarneqartarnerat ajorpallaartoq:

- Nalunaarusiani nalunaarutigineqartartut utikattuupput.

- Atuarlugu ilungersunartuuvoq, nalunaarusiarlu ukiut tamaasa tusaatissatut tiguneqartarluni. Pimoorunnerullugu tigusariqalerparput, Jens Napaattooq oqarpoq.

- Kukkunigut ilinniutigissavavut - tusaatissatut tiguinnarnagit

Demokraatineersup Anna Wangenheimip aamma politikkereqatini sukannersumik oqaluuppai. Pingaartumik meeqqat pineqatillugit inatsimmik unioqqutitsisoqartarnera taassuma ernummatigaa. Kommunit inatsimmik qanoq malinnittarnissaat paasiniarlugu Inatsisartut iliuuseqarnerusariaqartut taanna oqarpoq:

- Asasakka politikkereqatikka. Inatsisiliagut misissortigit siunissamilu nutaanik siunnersuusiorluta, inatsisit malinneqannginnerinut, annertuumik pitsanngorsaataasinnaasunik, inatsisillu pitsanngorsarniarnerinut Ombudsmandip maluginiagai innersuussutaalu atortigit. Kukkunigummi ilinniutigisartussaavagut, tusaatissatut tiguinnarnagit qanoriliuuseqaratalu, taanna oqaluttarfimmiit oqarpoq.

Ombudsmandilli nalunaarusiaa aammaarluni tusaatissatut tiguneqarpoq.