Ataatsimiititaliaq: Meeqqanik atornerluisoqarsimatillugu pineqaatissiisarneq sakkortusineqassaaq
Kinguaassiuutitigut meeqqanik atornerluisoqarsimatillugu pineqaatissiisarneq sakkortunerulersinneqassaaq, ataatsimiititaliaq Naalakkersuisut allannguutissatut siunnersuutaannik aamma itigartitsisoq oqarpoq.
Inatsisartut tallimanngorpat kinguaassiuutitigut meeqqank atornerluisoqarsimatillugu pineqaatissiisarnerup sakkortusineqarnissaanik siunnersuut suliarissavaat.
Tassunga atatillugu Inatsisinut Ataatsimiititaliaq isumaliutissiissutimini Naalakkersuisunut naveersivoq. Ataatsimiititaliamit Naalakkersuisut allannguutissatut siunnersuutaat itigartinneqarpoq, meeqqanilli kinguaassiuutitigut atornerluisoqarsimatillugu pineqaatissiisarnerup sakkortusineqarnissaanik siunnersuut atuutsiinnarneqarpoq.
Tamatuma saniatigut ataatsimiititaliamit eqqaasissutigineqarpoq, ukiut qulit matuma siornatigut aalajangiisoqarsimasoq malitseqartinneqarsimanngitsumik. Taamanikkut aalajangiinermi pineqarsimavoq, inuit innarliisimasut pinngitsaaliisimasulluunniit katsorsarneqartassasut.
Suliaq Sofia Geislerip Inuit Ataqatigiinneersuup siunnersuutaanik tunngaveqartoq, ullumi tallimanngornermi Inatsisartuni aappassaaneerlugu suliarineqassaaq.
Naalakkersuisut pineqaatissiisarnerit sakkortusineqarnissaannik kissaateqartut
Inatsisartuni ilaasortap 2019-imi ukiakkut ataatsimiinnermi siunnersuutigaa, kinguaassiuutitigut meeqqanik atornerluisoqarsimatillugu pineqaatissiisarnerup sakkortusineqarnissaa siunertaralugu Naalakkersuisut Naalagaaffeqatigiinnermi oqartussanut saaffiginnissasut.
Naalakkersuisut siunnersuutip suliarineqarnerani ilisimatitsissutigaat, pinerluttulerinermi inatsimmi pineqaatissiissutinut killigititaasup ukiunit qulinit ukiunut 16-inut qaffanneqarnissaa siunertaralugu Danmarkimi inatsisinik atuutsitsinermut ministerimut saffiginnittoqareersimasoq.
Naalakkersuisut aamma pinerluutinut ataasiakkaanut danskit pillaatigisartagaannut naapertuuttumik pineqaatissiisoqartalernissaanik kissaateqarnertik inatsisinik atuutsitsinermut ministerimut anngussimavaat.
Meeqqanik atornerluisoqarsimatillugu sakkortunerusumik pineqaatissiisoqartalernissaanik tamanna takutitsissaaq. Naalakkersuisullu taamatut tunngavilersuillutik, Naalakkersuisut suliamik tassannga suliaqarnerannik Inatsisartut tapersersuinissaannut allannguutissatut siunnersuummik saqqummiussipput.
Ataatsimiititaliaq tupigusuttoq
Inarsartulli Inatsisinut Ataatsimiititaliaani amerlanerussuteqartut tamatumannga itigartitsipput, ataatsimiititaliami Sofia Geislerip siunnersuutaa maanna suliarineqarsimalerpoq, isumaliutissiissummillu tunniussaqarsimallutik.
Ataatsimiititaliamit siullertut tupigusuutigineqarpoq, Kalaallit Nunaanni pinerluttulerinermut inatsimmik annertuumik allannguisoqarnissaanik kissaateqarneq pillugu inatsisinik atuutsitsinermut ministerimut saaffiginnissimaneq pillugu Naalakkersuisut kingusinnerusukkut inatsisinut ataatsimiititaliamut aatsaat ilisimatitsisimanerat.
- Naalakkersuisut tamatuminnga aatsaat ulloq 25. oktober 2019-imi ataatsimiititaliamut ilisimatitsinissaminnut tunngavissarsisimanerat ataatsimiititaliamit eqqumiigineqarsinnaavoq. Tamanna pingaartumik Kalaallit Nunaanni inatsisit atortinneqarneranni annertuumik allannguutissaq pineqarnera eqqarsaatigalugu, Ataatsimiititaliaq allappoq.
Geislerip siunnersuutaa attatiinnarneqartoq
Ataatsimiititaliamit aamma oqaatigineqarpoq:
- Siunnersuutaaqqaartoq, Naalakkersuisut allannguutissatut siunnersuutaattut pinnani Kalaallit Nunaanni pinerluttulerinermi inatsimmik qallunaanngorsaanissamik siunertaqanngirnmat, matumani aamma pillaatissatut killiliissutinik eqqussinikkut kiisalu inatsisinik unioqqutitsinemp peqqarniissusianik tunngaveqarnerup aamma iliuuseqartoq aallaavigalugu tunngaveqarnerup akornanni oqimaaqatigiissitsinerup allanngortinneqarneratigut.
Inatsisinut Ataatsimiititaliap taamaammat inassutigaa, Naalakkersuisut allannguutissatut siunnersuutaat itigartinneqassaspq, amerlanerussuteqartullu, tassaasut Siumut, Inuit Ataqatigiit Demokraatillu Sofia Geislerip aalajangiiffigisassatut siunnersuutaa akuerineqassasoq inassutigivaat.