Ataatsimiititaliaq isumaqatigiittoq: Inuussutissalerinermut oqartussaaffik angerlaalli
Aalisarnermut, Piniarnermut Nunalerinermullu Ataatsisimiititaliaq, Naalakkersuisut isumaannut akerliusumik, uumasunut nakorsaqarnermut inuussutissalerinermullu tunngasutigut oqartussaaffik aappaagu ukiakkut katersuunnermi angerlaanneqassasoq Naalakkersuisunut peqqusipput.
Uumasunut nakorsaqarnermut inuussutissalerinermullu tunngasutigut oqartussaaffik angerlaanneqarnerani aningaasatigut kingunerisassai tamakkiisumik takusinnatinnagit pineqartut angerlaanneqarnissaat Naalakkersuisunit ernumassutigineqarpoq. tamanna Naalakkersuisut akissuteqaataanni takuneqarsinnaavoq.
Ernumassuteqarnermi Aalisarnermut, Piniarnermut Nunalerinermullu Ataatsimiititaaliami ilaasortanit isumaqatigineqanngilaq, ataatsimiititaliaq aalajangiiffigisassatut siunnersuutip aappassaaneerlugu suliarineqannginnerani imatut allagaqarpoq:
Ilisimasat naammattut
- Ataatsimiititaliaq ataatsimut isigalugu inerniliivoq tunngavissat pigineqartut tunngavigalugit inuussutissalerinermut uumasunullu nakorsaqarnerrnut suliassaqarfiup Naalakkersuisunit tiguneqarnissaanut inuussutissalerinermut uumasunullu nakorsaqarnermut suliassaqarfik aammalu aningaasaqarnikkut allaffissornikkullu kingunerisassat pillugit ilisimasat naammattut maanna pigineqartut , ataatsimiititaliaq allappoq nangillunilu:
- Ataatsimiititaliaq isumaqarpoq tigusinissaq allanik nassuiaasiortoqarnissaanik utaqqimaarnermit kinguarsaqqinneqassanngitsoq aammalu tamanna tunngavigalugu ataatsimiititaliaq isumaqatigiittoq ima allannguutissatut siunnersuuteqarpoq: Uumasunut nakorsaqarnermut inuussutissalerinermullu suliassaqarfiup tamakkiisup UKA 2020-mi tiguneqarnissaanik Naalakkersuisut peqquneqarnissaannik Inatsisartut aalajangiiffigisassaattut siunnersuut.
Marlunngorpat aappassaaneerinninnissaq
Suleqatigiiissitsisut Nunattalu Qitornai tamarmik ataatsimik inatsisartuni ilaasortaatitallit kisiisa minillugit, partiit tamarmik ataatsimiititaliami ilaasortaatitaqarput.
Ataatsimiititaliami ilaasortat Naalakkersuisut isumaannut akerliusut tassaapput: Henrik Fleischer aamma Jens Danielsen Siumut, Aqaluaq B. Egede aamma Múte B. Egede IA, Siverth K. Heilmann, Atassut, Hans Enoksen, Partii Naleraq, aamma Steen Lynge Demokraatit.
Aalajangiiffigisassatut siunnersuut aqangu marlunngorpat Inatsisartuni aappassaaneerlugu suliarineqassaaq.