Ataatsimiititaliaq danskit ministeriannut piffissaqanngilaq

Nunanut allanut sillimaniarnermullu ataatsimiititaliap danskillu nunanut allanut ministeriata, ataqatigiinnerup nukittorsarneqarnissaanik siunertaqarluni ataatsimiinnissaagaluat isornartorsiuinerinnanngorpoq. Ataatsimiititaliaq ataatsimeeqataassanani nalunaarpoq.

Danskit nunanut allanut ministeriat Jeppe Kofod nunatsinnut angalanerani Danmarkip Kalaallit Nunaatalu ataqatigiinnerisa nukittorsarneqarnissaat pingaarnerpaavoq. Ministerip Nuummut tikinnissaa ullormik ataatsimik sioqqullugu, nunanut allanut ministeriaqarfik tusagassiorfinnut taama nalunaaruteqarpoq. Ataatsimiinnissaq siusinnerusukkut nalunaarutigineqarsimanngilaq.

Tassanngaannartumik nalunaaruteqariasaarneq Inatsisartuni Nunanut allanut Sillimaniarnermullu Ataatsimiititaliamit uissuummisitsivoq.

- Ataatsimiititaliamut ilaasortat aamma Inatsisartut ataatsimiititaliaanni allani pisussaaffeqarmata allanik ataatsimiititaliaq ajoraluartumik taamak sivikitsigisumik piffissaqartitsilluni paasissutissiiviusumik ataatsimiinnermut peqataasinnaanngilaq, ataatsimiitialiap siulittaasua, Aleqa Hammond, ataatsimiinnissaq ullormik ataatsimik sioqqullugu tusagassiorfinnut taama nalunaaruteqarluni atsiortuuvoq.

Nunanut allanut ministeriaqarfiup pisortatigoortumik nalunaaruteqannginnerani ataatsimiititaliaq paasissutissiiviusumik ataatsimiittoqassasoq ilisimatinneqarsimanngilaq. Ataatsimiinnissarlu paasissutissiiviusussaq pillugu ataatsimiititaliami ilaasortat ministeriaqarfimmit tallimanngormat aatsaat ilisimatinneqarput.

- Nunanut allanut ministeriaqarfiup tusagassiorfinnut nalunaarutaani nunanut allanut ministeri ima issuarneqarpoq, “Uummaarissumik, naligiiffiusumik, ataqqeqatigiiffiusumik, piffissarlu ilutigalugu ineriartorfiusumik naalagaaffeqatigiinnerup qulakkeerneqarnissaa uannut pingaartuuvoq. Tamanna aamma suliassaqarfimmut nunanut allanut sillimaniarnermullu tunngassuteqartumut atuuppoq, ataatsimiititaliaq tusagassiorfinnut nalunaaruteqarluni tikkuaavoq.

- Naalagaaffeqatigiinnermi ataatsimut sulinermi naligiissutsip ataqqeqatigiinnerullu tunngavissaatinneqartariaqarnerat ataatsimiititaliamit isumaqatigineqarpoq. Taamaammat tamanna eqqarsaatigalugu Nunanut Allanut Sillimaniarnermullu Ataatsimiititaliap paasissutissiiviusumik ataatsimiinnermut qaaqqusissut ataatsimiinnissaq ullualunnguanik sioqqullugu aatsaat tigummagu uggornartorujussuuvoq, ataatsimiititaliaq allappoq.

Ataatsimiititaliaq isumaqarpoq piffissaatillugu qaaqqusissut apuunneqarsimagaluarpat, ministerimut piffisaqarsinnaasimassagaluarlutik, ataatsimiititaliaq erseqqissaavoq.

- Ataatsimiititaliap piffissaalluartillugu qaaqqusaasimanissaa kissaatiginaraluarpoq. Taamaattoqarsimagaluarpat ataatsimiititaliaq qularnanngitsumik nunanut allanut ministerimik naapitsinissamut piffissaqarsimassagaluarpoq. Nunanut allanut ministerimik kingusinnerusumkkut ataatsimeeqateqarsinnaaneq ataatsimiititaliamit qilanaarineqarpoq.

Powered by Labrador CMS