Ataatsimiititaliaq cannabis-uulianut eqqarsarnartoqartitsisoq: Innuttaasut peqqissusaannik nakkutiginninnissaq eqqaamaneqassaaq

Cannabisuuliamik eqqussisinnaaneq inerteqqutaajunnaarpat, Naalakkersuisut innuttaasut peqqissusaannik nakkutiginninnissaat, aamma ikiaroornartut inerteqqutaanngitsut inerteqqutaasullu nakkutigineqarnissaannik qulakkeerinnittoqarnissaa pingaaruteqarpoq, Ilaqutariinnermut Peqqissutsimullu Ataatsimiititaliap taama oqariartuuteqarpoq

Ilaqutariinnermut Peqqissutsimullu Ataatsimiititaliap inatsisissatut siunnersuut cannabisuuliamik annerpaamik 0,2 procentimik THC-mik akulimmik eqqussuisinnaanermut aqqutissiuussisoq qulaajarnikuuaa.

Ataatsimiititaliap siunnersuut tapersersorpaa, taamaakkaluartorlu Naalakkersuisunut piumasaqaateqarpoq.

Inatsimmik aqutsinermi Naalakkersuisut innuttaasut peqqissusaat mianersuutissagaat, ataatsimiititaliap oqariartuutigaa. Tassami cannabisuuliamimmik eqqussisinnaanerup inerteqqutaajunnaarsinneqarneratigut innuttaasut peqqissusaannut qanoq sunniuteqarumaarneranik erseqqissumik takussutissaqanngilaq.

Tassunga atatillugu ikiaroornartut inerteqqutaanngitsut inerteqqutaasullu nakkutigineqarnerisa qulakkeerneqarnissaat, ataatsimiititaliap kissaatigaa.

Ataatsimiititaliap aamma inatsimmik allannguinerup aningaasaqarnikkut kingunerisassai maluginiarpai.

Nakorsaaneqarfik 600.000 kr.-inik pissarsissaaq

Nakorsaaneq 600.000 koruuninik aningaasaliiffigineqassaaq, uuliat assigiinngitsut eqqunneqarnissaannut qinnuteqaatit nakorsaaneqarfiup suliarisartussaammagit.

Siunnersuut allanik aningaasartuuteqalersitsissagaluarpat, aningaasat maanna aningaasaliissutaasunit nassaarineqartariaqassapput, tamannalu suliassat allat tunulliunneqarnissaanik kinguneqassaaq.

Naalakkersuisup Mimi Karlsenip (IA) suliaq nakkutiginiarlugu neriorsuivoq:

- Naalakkersuisut innuttaasut ineriartornerat peqqissusaallu nakkutigaat pissusissamisullu imaluunniit pisariaqalissagaluarpat tamanna qisuariarfigineqassalluni, Mimi Karlsen oqaluttarfimmit oqarpoq.

Inatsisissatut siunnersuut sapaatip-akunnerata siuliani pingajussaanik suliarisassanngorlugu nassiunneqarpoq, tassanilu inaarutaasumik akuerineqassaaq. Inatsisip allanngorneqarnera ukiumit nutaamit atulernissaa naatsorsuutigineqarpoq.

Powered by Labrador CMS