Ataatsimiititaliaq ATV-nik ingerlatsisinnaanermut allagartaqarnissamut piumasaqaammik nalilersuiniartoq

Danskit kalaallillu oqartussaasuisa attaveqatigiinnermut ataatsimiititaliaata, ATV-nik ingerlatsisinnaanermut allagartaqarnissamut piumasaqaat atorsunnaarsinneqarsinnaanersoq misissorniarpaa.

Nunaqarfinni tamani ingerlatsisinnaanermut allagartamik pissarsisoqarsinnaanngimmat, ATV-nik ingerlatsinissamut allagartaqarnissamik piumasaqaateqarnera ajornartorsiutaavoq, folketingimi ilaasortaq Aaja Chemnitz Larsen (IA) Danmarkimi assartuinermut ministerimut allappoq.

- Kalaallit Nunaanni najugaqarfinni arlalinni innuttaasut, ATV inunnik napparsimasunut, innarluutilinnut, allakkanik agguaarsinermut assartuutitut aamma soorlu savaatilittut inuussutissarsiuteqarnermi pinngitsoorsinnaanngilaat. Kalaallit Nunaanni ATV-nik ingerlatsinissamut allagartaqarnissamik piumasaqaateqarneq aporfiuvoq, Aaja Chemnitz Larsen allappoq.

Ministeri akissuteqarnermini allappoq, ingerlatsinissamut allagartaqarnissamik piumasaqaateqarnermi siullertut angallannikkut isumannaatsuunissaq eqqarsaataasoq, allnnguutissalli atuutsinneqalersinnaapput:

Allannguisoqarsinnaasoq

- Kalaallit Nunaanni ATV-nik ingerlatsisarnermut atatillugu malittarisassat naleqqussarneqarsinnaanerat mattureernianngilara, allannguisoqassappalli erseqqinnerusumik misissuisoqarlunilu angallannermi isumannaallisaanissaq eqqarsaattigalugu isumannaatsumik oqimaaqatigiissitsisoqartariaqarpoq, assartuinermut ministeri Benny Engelbrecht allappoq.

Suliaq siusinnerusukkut qaqinneqarsimavoq, ukiunili kingullerni ingerlateqqinneqarsimarpasinnani. Ministerilli maanna ilisimatitsissutigaa, attaveqatigiinnermut ataatsiimititaliaq, danskit kalaallillu oqartussaasuinik inuttalik, februaarimi pilersinneqarsimasoq.

Inatsit nalilersorneqassasoq

Ataatsimiititaliap Kalaallit Nunaanni angallannermut inatsit nutartertariaqarnersoq misissussavaa:

- ATV-nut taakkuninngalu ingerlatsinissamut allagartaqarnissamut piumasaqaateqarnermut malittarisassat, attaveqatigiinnermut ataatsimiititaliap oqaluuserissavaa, Benny Engelbrecht allappoq.

Ataatsimiititaliarli coronap ajornartorsiutaanera pissutigalugu suli ataatsimiinngilaq, minissterilli naatsorsuutigaa, ataatsimiititalia sapinngisamik piaarnerpaamik ataatsimiissasoq.

Powered by Labrador CMS