Sapaatip-akunnerata siuliani aatsitassanut inatsisip nutaap aappassaaneerneqarnerani Siumup IA-llu akornanni isumaqatigiinngitsoqarmat akuerineqanngilaq. Inatsisissatut siunnersuut taamaattumik Inuussutissarsiornermut Aatsitassanullu Ataatsimiititaliamut ilassutitut suliarineqartussanngortinneqarpoq.

Siunnersuut marlunngornermi Inatsisartuni oqaluuserineqaqqippoq, upernaakkut ataatsimiinnerup pingasunngornermi naammassinnginnerani inatsisip inaarutaasumik suliarineqarnissaa anguniarneqarluni.

Inuussutissarsiornermut Aatsitassanullu Ataatsimiititaliap Mariane Paviasen (IA) siulittaasoralugu ilassutitut suliarinninnermut atatillugu siunnersuummi allannguutissatut Naalakkersuisunut piumasaqaatinik saqqummiussaqarpoq.

Sulisitsisut naaperiarneqartut

Allannguutissatut siunnersuutini saqqummiunneqartuni arlalinni Sulisitsisut naaperiarneqarput, aatsitassarsiornermik suliaqartut akornuserneqarsinnaanerannik taakku ernumassuteqarput. Siumut sapaatip-akunnerata siuliani aamma taamatut ataatsimiittarfimmi ernumassuteqarnerarpoq.

Tusarniaanermi piffissaliunneqartup qanoq sivisussuseqartarnissaanik Naalakkersuisut ersarinnerusumik nassuiaateqarnissaannik, ataatsimiititaliaq assersuutigalugu piumasaqarpoq. Tamatuma saniatigut kalaallit sulisut atorneqartarnerinut aamma sulisinneqartunut kiisalu saffiugassat nunani allani suliarineqartarnerinut inatsisit ilaat allanngortinneqarput, taamaalilluni maanna aatsitassanut inatsimmi aalajangersakkat ingerlateqqinneqarlutik.

Marlunngornermi aappassaaneerlugu suliareqqinneqarneranut atatillugu, ataatsimiititaliap piumasaqaatai Naalakkersuisut naammassissagaat aamma allannguutissatut siunnersuutit pingasunngornermi pingajussaaneerneqannginnerani suliarineqassasut ilisimatitsissutigaat.